PM lo zin tur atana ruahmannate thlirho

Home minister K Sapdanga kaihhruaiin nimin khan Secretariat conference hall-ah sorkar hotuten September 13, 2025-a Aizawla lo zin tur Prime Minister dawnsawn dan tura ruahmannate an thlirho a; Prime Minister chetvelna hmuna venhimna kalpui dan tura ruahmanna leh Prime Minister hmuha pho chhuah tur thil hrang hrang buatsaihte an sawiho a ni.

Prime minister Narendra Modi hian September 13, 2025 khian Lammual aṭangin Bairabi - Sairang rel kawng thar a hawng dawn a; Home Minister chuan, India ram state dangte leh Mizoram thlunzawmna tur rel kawng pawimawh tak hawng tura Prime Minister lokal tur chu ṭha taka dawnsawn a pawimawh thu sawiin, "Mizorama a chàm chhunga hun hlawk thlak tak a hman theih nan kan mawhphurhna ṭheuhte ṭha taka kan hlenchhuah a pawimawh dawn a ni," a ti.

Ṭhutkhawmah hian Lengpui Airport, Sairang rel chawlhhmun, Ṭhuampui helipad leh Lammuala venhimna, chawlh hahdamna hmun, inkalpawhna ṭha leh inbiakpawhna, ṭhutna leh medical duty ruahman dan bakah, Prime Minister hmuha pho chhuah tur thil chi hrang hrang buatsaihte enho a ni a; chief secretary Khilli Ram Meena chuan hmalakna hrang hrang a sawifiah.

DGP, GAD, PWD, Health & Family Welfare, Coorperation, Power & Electricity, Art & Culture, ICT, School Education, Horticulture, Planning leh Information & Public Relations department hotute bakah, North Eastern Frontier Railways leh mi pawimawh dangte an tel.