CSS-a thawkte'n a huhoin ni 3 chawlh an la dawn

All Mizoram CSS Employees Coordination Commit-tee (AMCECC) bultumin CSS hnuaia thawkte chuan sorkar laka an lungawi lohna lantirna atan vawiin aṭangin ni thum chhung a huhoin chawlh (mass casual leave) an la dawn.

AMCECC chuan thuchhuah siamin, sorkar laka an thil phutah an huntiam (nimin) thlengin thu lawmawm an hmu lo tih tarlangin, "September 3, 2025-a general body meeting-a kan lo rel tawh angin, September 9, 10 leh 11, 2025 chhung mass casual leave kan la dawn," an ti a, an member-te chu casual leave la vek turin an hriattir.

Mahni awmhmunah lungrual taka an dikna chanvo an hmuhtheih nan ṭhahnemngai lehzual tura an member-te ngenin AMCECC chuan, "He mass casual leave kan lak avanga member-te zingah harsatna tawk an awm a nih chuan AMCECC-in hma a la zel ang," an ti a, sorkar department hrang hrang an awm avangin harsatna thleng thei lakah mipuite hriatthiamna an ngen.

Tunah hian state sorkar hnuaiah CSS Employees mi 10,000 chuang an awm mek a, coordination committee hnuaiah hian department hrang hrang aṭangin association 16 an tel a ni.

AMCECC thil phutte :

1. CSS employees-te’n regularisation scheme min siam sak hi kan hman ve ngei theih nan siam rem ngai min siam rem sak tura sorkarin ngaihtuahna a seng miah lo leh, DPAR Minister thurawn anga AMCECC-in representation ni 19.05.2025 a kan thehluh tawh lehkha min tih bo sak leh a thlenna tur official hnen a thleng lo hi mak kan ti. Chuvangin, Regulariation of CSS Employees Scheme, 2024 a taka kan hman ngei theih nan kan representation thehluh hi rang taka min ngaihtuah sak a, min tihhlawhtlin sak turin sorkar kan phut tlat a ni.

2. Mizoram sorkar hnuaia thawk, CSS employees-te’n Regularisation of CSS Employees Scheme, 2024 hnuaia department hrang hrang proposal an hnawl zel lai a, CSS pawh ni lo, Health Department hnuaia thawk health worker mi 31, MR skilled II, PE-a convert-te, he dan hmanga an dah nghet hi mak kan ti. Induhsakna uchuak hi kan ngaithiam loin tun hnuah thleng tawh lo se kan ti. He appointment hi sorkarin cancel ngei rawh se.

3. CSS hnuaia thawkte ‘dan lo ang a lak’ tia kan Chief Minister zahawm takin, kum 2025 Independence Day lawmna a, a sawi hi na kan ti. CSS hnuaia thawkte hi dan ang thlap a lak kan ni a, dan lo ang a lak kan awm chuan, dan lo ang a latute chu zawng chhuak a, action na taka lak ni rawh se.