MUHCS hlawhtling taka kalpui a ni - Health Minister

Mizoram State Healthcare Society (MSHCS) official website - mshcs.mizoram.gov.in nimin khan Secretariat conference hall-ah tlangzarh a ni a, a tlangzarhtu Health minister Lalrinpuii chuan Mizoram Universal Health Care Scheme (MUHCS) chu hlawhtling taka kalpui a nih thu a sawi.

Health Minister chuan MUHCS chu hlawhtling taka kalpui zel a nih thu sawiin, "Chhawr ṭangkai tam tak an awm tawh. A hlawhtlin theih nana theihtawp chhuahtute chungah ka lawm hle. Cashless system hman a nih avangin chhungkaw tam tak phurrit a chhawk. He scheme zawmtu, empanelled hospital pawh an awm ve nual tawh," a ti a, mipuite leh sorkar hnathawkte chu empanelled hospital-ah zel in admit turin a chah.

MUHCS hnuaiah hian state pawna inenkawl turte tan medical board paltlang ṭul tawh mah se, refer kawngah harsatna a awm dawn loh thu sawiin Lalrinpuii chuan, "Thil mumal taka kalpui duhna vang zawk a ni. Emergency case-ah phei chuan awlsam taka kalpui a nih theih dan tur ngaihtuah zel a ni dawn. Website tlangzarh tak hi mipuite harsatna tam tak chingfeltu a nih ngei ka beisei," a ti.

MSHCS CEO Dr Lalhriatzuali Ralte sawi danin, April 1, 2025 aṭangin tun thlengin Mizoram chhungah empanelled private hospital 11 leh private day care centres pathum an awm. Mizoram pawnah empanelled hospital 25 awmin, deemed empanelled hospital 13 an awm.

MUHCS hnuaiah hian Mizoram chhung hospital-ah mi 30,565 te inentirna man tumsak tawh niin, Mizoram pawnah mi 698 te inentirna man tumsak tawh a ni. Heng mi 31,263 te inentirna man atana MUHCS-in a tumsak tawh zat hi a vai belhkhawmin Rs. 42,06,73,812 a ni.

Website tlangzarh tak kaltlang hian MUHCS chungchanga zawhna tam tak awm ṭhin, empanelled hospital awm zat te, MUHCS kalphung leh MUHCS chungchanga thuthar apiangte chu rang takin a hriat nghal zel theih tawh dawn a ni.