Ziak leh chhiar thiam hlutzia Inzirtirna hun buatsaih a ni

Home minister K Sapdanga chuan nimin khan School Education directorate-ah School Education department hnuaia Adult Education Wing buatsaih, ziak leh chhiar thiam hlutzia leh a pawimawhna inzirtirna 'International Literacy Day 2025' hmanpuiin, School Education department chanchinbu 'Meichher Golden Jubilee Special Edition 2025' a tlangzarh.

K Sapdanga chuan, Meichher chanchinbuin kum 50 a tling chu a lawmpui thu a sawi a, "Meichher buatsaihtute chuan ziak mite cho chhuahna rilru pua, thu ṭha hmanga hmasawnna kawngte a tam thei ang berin an chhiar theih nana an ṭhahnemngaihnate hi an hlawhtlinna chhan niin ka hria. Hlawhtlinna chang tawhte chanchin chuan rilru a khawih hle a, hlêp zat tur chhût ai chuan miin zar an zo theih dan tur chhût chuan hlawhtlinna dik tak a thlen ṭhin," a ti.

Tunlai khawvel chu digital era a nih chhoh mek thu sawiin K Spadanga chuan, "Kumin International Literacy Day thupui chu 'Promoting literacy in the digital area' a ni a, internet khawvelah kan chen tawh avangin digital media aṭanga kan duh zawng koh chhuah mai a awlsam tawh. Literacy digital publication chu khawvela literacy-in a thlen san theih ber a niin ka hria, " a ti a, theihtawp chhuaha ram leh mipui tana thawk chhunzawm zel turin kalkhawmte a sawm.

Inkhawmah hian School Education director Angela Zothanpuii chuan inlawmna thu sawiin, International Literacy Day 2025 puala School Education Minister thuchah a chhiar chhuak a; School Education assistant director (Adult Education Wing) TC Lalremsiama leh Meichher chanchinbua sulsutu R Lalrawnaten thu an sawi bakah, Meichher Golden Jubilee Special Edition Sub-Committee chairman R Lallianzuala pawhin thu a sawi bawk.