CM Special Package sem chhuah a ni

Animal Husbandry & Veterinary department hnuaia Bana Kaih (Handholsing) Scheme kaltlanga Chief Ministers Special Package dawng tura thlan (progress partner) mi 203-te tan nimin khan Vanapa Hall-ah orientation training buatsaih a ni. Planning secretary Lalmalsawma Pachuau-in hmanpuiin training zote hnenah certificate a hlan a, an bank account-ah direct benefit transfer hmangin pawisa thun nghal a ni.

Lalmalsawma Pachuau chuan, Handholding Scheme hnuaia CM Special Package dawngtute beneficiaries ti loa progress partners tih an nih chhan chu Mizoram hmasawnna tura sorkarin thawhpui atana a thlante an nih vang a nih thu a sawi a, "Sum harsatna karah pawh installment-a in pe loin a hlawmin vawi khatah kan pe vek che u a ni. Sorkarin thawhpui atana a rin ngam ang che u in nangni pawhin rinawm takin in pawisa dawnte hi a hmanna tur dik takah hmang turin sorkar chuan a beisei tlat che u a ni," a ti.

Monitoring team-te'n porgress partner-te hmalakna an vil reng dawn tih sawiin Lalmalsawma chuan, "An hàm strict hle dawn tih pawh in hriat reng a ṭha ang. UDPA Minister-in self help group-te fuih nana a sawifo ṭhin - 'Hausak aiin ngialnghet hi tum hmasak tur' a tih ṭhin ang khan progress partner-te hian CM Special Package-in dawn hmang hian ngialnghehna rahbi rinawm tak neih tum ang che u," a ti a, progress partner-te chu taima taka hma la turin a chah.

Training-ah hian Aizawl district brawhsap Lalhriatpuia’n inlawmna thu a sawi a; Planning department hotute, Lead District office leh Mizoram Start-Up Mission (MSUM) aiawhten thil pawimawh an zirtir. Progress partners mi 203-te bank account-ah direct benefit transfer hmangin an sum dawn tur thun nghal a ni a, nimina lut hman lote chu vawiinah thun chhunzawm tur a ni.