Mizoram 100% literacy a nih chhan ṭanrualna vang - Education Minister

Education minister Dr Vanlalthlana chuan September 8, Thawhṭanni khan Janpath Road, New Delhi-a International Literacy Day hmannaah a tel a; Mizoramin 100% literacy a neih chhan chu ṭanrualna vang a nih thu a sawi.

Education Minister chuan, Mizoram fully literate state a nih theih chhan chu state sorkar leh central sorkar thawhhona ṭhat vang a nih thu sawiin, "Kohhran, NGO, civil society leh Education department te ṭanrualna rah a ni. Hemiah hian duhtawk mai loin, zirna, a bikin skill development lamah hmasawn zel turin ṭan kan lak a ṭul. India ram hi ziak leh chhiar thiam vekna ramah siam turin Mizoram chuan sorkar laipui chu puih a inpeih reng a ni," a ti.

Mizoramin ziak leh chhiar lama bul a ṭan dan sawiin Minister chuan, "Hawrawp kan neih theihna chhan leh ziak leh chhiar kan thiam chhan chu British lal hun laia Kristian missionary-te vang a ni," a ti a; ziak leh chhiar chu inzirtir chhâwn zel a ni a, India ramin British laka zalenna a hmuh hnua literacy rate a pun theihna pawimawh tak pakhat chu Adult Education Wing a nih thu a sawi.

Dr Vanlalthlana chuan, Adult Education Wing-in New India Literacy Programme (NILP) tan nasa taka hma a lak thu sawiin, "Kum 2022-23 khan 96.41% literacy kan nei. Hmalakna hrang hrang zarah Ministry of Statistics and Programme Implementation hnuaia Periodic Labour Survey Force Annual Report chuan July 2023 - June 2024 chhung khan Mizorama awm kum sarih chin chunglam ziak leh chhiar thiam zawng zawng chu 98.2% an nih thu a rawn puang a ni," a ti. May 20, 2025 khan Understanding of Lifelong Learning for All in Society (ULLAS)-in Mizoram chu India rama a hmasa ber atan fully literate state-ah an puan thu a sawi bawk.