Larsap leh MJA hruaitute an inkâwm

MJA General Headquarters hruaitute chuan nimin khan Raj Bhavan-ah Governor Gen. Dr Vijay Kumar Singh an hmu a, MJA hmalaknate an hrilh bakah, thil chi hrang hrang an sawiho.

MJA hruaitute chuan, MJA member-te tan India sipai hrang hrang hmunte tlawh dilna Lok Sabha MP Richard Vanlalhmangaiha kaltlanga Union Defence minister Rajnath Singh hnena thlen chuyngchang hrilhin, a hlawhtlin theih nan theihtawpa bawhzuisak turin an ngen. Larsap chuan, MJA ngenna chu a hlawhtlin theih nan theihtawpa a lo bawhzuipui tur thu a lo hrilh.

Inkawmnaah hian Mizo ṭhalai tam zawk sipaia an luh theih dan tur te, Mizorama Army battalion leh air force Station din chungchang te, sipai officer-ah Mizo ṭhalai tam zawk an luh theih nan Chhingchhipa Sainik School chu ṭha taka a kal a, tun aia a changtlun lehzual a ṭul thute sawi lan a ni.

Larsap Gen. VK Singh chuan, Mizo ṭhalai, sipaia ṭan tum zingah lehkha pawimawh nei famkim lo an awm ṭhin chu harsatna pakhat a nih thu MJA hruaitute a lo hrilh a; sipaia ṭan tumte chu lehkha pawimawh hrang hrang voter identity card, Aadhaar card leh ration card-ahte hming inmil thlap nei ṭhin turin a chah.

Governor chuan, chanchinbumite chu khua leh tuite zirtirna peka pawimawh an nih thu sawiin, ram hmasawn nana pawimawh leh mipui hriattur ṭulte theihtawp chhuaha puangzar zel turin a chah a; Mizo ṭhalai tam zawk sipaia an luh theih nan sorkarin Recruitment Office kaltlanga theihtawp a chhuah thu a sawi.

Sorkar laipuiin zirna tihhmasawn nan sum leh pai tam tak a sen thu leh Mizoramah sikul ṭha tak tak a din thu sawiin Larsap chuan, Eklavya Model Residencial School, Kendriya Vidyalaya, Sainik School leh Jawahar Navodaya Vidyalaya te chu Mizo mipuite'n an hriat chian lehzual a, an chhawr ṭangkai theih nan puanzar leh zirtir kawngah ṭan la turin MJA hruaitute a sáwm bawk.