KHAWTHLIR

Dan loa hralh leh lakluh khap

Khawzawl bawrhsap K Vanlalṭhiana chuan thupek chhuahin, Khawzawl district-ah dan loa damdawi hralh/pek chhuah khap a nih thu a puang. Mizoram pawn leh ASF hri lenna district aṭangin vawk, vawksa leh vawksa aṭanga siam lak luh, thawn chhuah leh, dan loa kuhva rah lak luh leh phurh khap a nih thu a tarlang bawk. Thupek bawhchhiate chu dan anga hrem theih an ni.

5G inzirtir

Serchhip College leh Amantya Technology ṭang dun chuan nimin khan Serchhip College-ah Serchhipa high school zirlaite leh zirtirtute bakah, Serchhip SDEO leh medical department aiawhte pualin 5G technology inzirtirna an buatsaih a, bawrhsap Paul L Khuma'n a hmanpui. Zirlaite'n Serchhip College-a 5G Training Lab an tlawh nghal a ni.

MPCC VP thar

Mizoram Pradesh Congress Committee (MPCC) president Lal Thanzara chuan nimin khan an party vice president atan John Rotluangliana a ruat. John Rotluangliana hi minister hlui a ni a, MPCC vice president a nih hun chhung tur chu MPCC term ding lai ang a ni ang.

Kawng khâr dawn

Vaivakawn aṭanga Bazar Bungkawn panna kawng chu vawiin hian siam a ni dawn a; hei vang hian zing dar 9 leh tlai dar 5 inkarah kawng khar a nih dawn thu Traffic SP Ruatsanga Ralte-in a tarlang.

Lawngtlaiah ṭhukhawm

Lawngtlai DC Donny Lalruatsanga kaihhruaiin September 8, Thawhṭanni khan DC conference hall-ah sorkar hotu (head of department)-te an ṭhukhawm. Bawrhsap chuan, Lawngtlai district-ah hmasawnna tluantling a awm theih nan sorkar department hrang hrang inkarah thawhho ṭha a awm a pawimawh thu a sawi a; sorkar hmalaknaah mipuite dikna chanvo ngai pawimawh tur te, mipui hnenah an hamṭhatna hrilh tam tur leh mipui tana dawr nuam tak ni zel turin a chah bawk.

Sangha khawi ṭanpuina

Champhai District Fisheries Development Office chuan September 8-9, 2025 khan Champhaia leilet neitu mi 240 hnenah PMMSY hnuaia Paddy Cum Fish Culture (buh hmuna sangha khawi) ṭanpuina an sem. Ṭanpuina hi PMMSY (2023-24) aṭangin leilet hectare 0.5 neitu mi 100 hnenah Rs 30,000 ṭheuh leh leilet hectare 0.25 neitu mi 100 hnenah Rs 15,000 ṭheuh sem a ni a, PMMSY (2024-25) aṭangin mi 40 hnenah Rs 15,000 ṭheuh pek a ni bawk.

Hmeichhe chunga hleilenna zirho

Nimin khan IPR conference hall-ah sorkar hotute leh Internal Complaint Committee member-te pualin hna thawhna hmuna hmeichhiate chunga hleihlenna leh mipat hmeichhiatna rawngkaia infiamna thleng thei ven dan tur (Prevention of Sexual Harassment of Women at Workplace) chungchang zirho a ni. He hun hi Kolasib bawrhsap Robert C Lalhmangaiha'n a hmanpui a; Kolasib judicial magistrate Zonunmawia'n thil pawimawhte a zirtir a ni.

Poshan Maah rêl

Lunglei district bawrhsap Navneet Mann kaihhruaiin nimin khan DC conference hall-ah sorkar hotute'n Lunglei district-a Rashtriya Poshan Maah (National Nutrition Month) hman dan tur an ngaihtuah. Poshan Maah hi nau pai, nau pawm leh naupangte’n chawṭha tlakchham vanga harsatna an tawh ṭhin sutkianna tura sorkar laipui hmalakna a ni a, September thla chhung hman ṭhin a ni.