India aiawhtu leh champion lawmpui

Social Welfare & Tribal Affairs minister Lalrinpuii chuan nimin khan a pisaah IBSA Judo World Championship 2025-a India aiawhtu David Lalremruata leh Northeast Blind Football Championship, 2025-a pakhatna Mizoram hmeichhe mitdel football team hnenah lawmpuina a hlan.

Lalrinpuii chuan, David Lalremruata leh Mizoram hmeichhe mitdel football team a lawmpui thu leh a chhuan thu a sawi a; châwl lo leh thâ thlah loa theih tawp chhuah chhunzawm turin a fuih a; khawvel huap inelna tam zawka inlan chhunzawm a, hlawhtlinna tam zawk nei turin a duhsakna a hlan a ni.

Social Welfare Minister chuan, rualbanlote ṭanpui leh dâwm kâng turin Social Welfare department-in hma an la tih a sawi a; tum bik ṭha tak neia hma lam pênpui tumna lam erawh sorkar ang chuan an la theng phak lo hle tih a sawi bawk.

David Lalremruata hi world ranking-ah 10-na a ni mek a; IBSA Judo World Championship 2025-ah India aiawhin a tel. Mizoram hmeichhe mitdel football team hi Guwahati-a 3rd Women’s IBFF Northeast Zonal Blind Football Championship-ah an champion a ni.