CM-in ruihhlo ngaite enkawlna a tlawh Ruihhlo bâwiha tàn loh dan - tih chhin loh - CM

Mizoram sorkar, kohhran leh tlawmngai pawlte ṭanghoin ruihhlo ngaite chhan chhuahna atana an buatsaih Hulhliap Short Stay Centre (SSC) neih mekna Synod Camping Centre, Sihphir Neihbawih chu nimin khan chief minister Lalduhoma'n a tlawh. CM chuan, ruihhlo bâwiha táng lo turin tih chhin miah loh tur a nih thu a sawi.

Hulhliap SSC-ah hian batch khatna leh hnihnaa lutm, a tawp thlenga awma chhuak tate chhui zuinaah nimin thleng khan 74% chu ruihhlo lakah an la fihlim zui zel tih hmuh chhuah a nih thu sorkar thuchhuahin a tarlang.

Chief Minister chuan, ruihhlo la ti lote hnenah a ṭhat lohzia uar takin zirtir mek a nih thu leh Nasha Mukt Bharat Abhiyan hmangin district tinah campaign neih a nih thu a sawi a, "Ruihhlo bâwiha tàn hauh loh dan chu tih chhin miah loh a ni a, ṭhangtharte hnenah i hrilh mawlh mawlh ang u," a ti.

Ruihhlo tawlh dan chah tumin nasa taka hmalak a nih thu sawiin Lalduhoma chuan, "Man pawh kan man nasa. A sangha lian pawh kan man zauh zauh tawh a, tunah hian ram dang aṭanga a rawn luhnate dan chah tumin Operation Jeriko kan kalpui leh mek," a ti a; ruihhlo do beihpui thlak mekah Security Coordination Committee din a ni a, security agent hrang hrangte nen hmalak a nih thu a sawi.

CM Lalduhoma chuan, Mizoramah ruihhlo vanga harsatna tâwk an tam avangin tuna mamawh ber nia a ngaih chu Hulhhliap SSC a nih thu a sawi a, "Ruihhlo ngaite'n an nghei theih nan kan ṭanpui a ni satliah lo a, a nghei hlente'n eizawnna an neih theihna turin skill training changkang tak kan pe nghal. Hetiang taka ruihhlo ngaite enkawlna kalpui hi a dang sawi tur a váng viau mai thei. Ruihhlo sim duh tak takte tan tun hun tluka hun ṭha a awm lo," a ti.

Chief Minister chuan, Hulhliap SSC-a awm mekte chu sim tumna tak tak nei tura fuihin, "He hmun in chhuahsan hunah thlêmna tam tak in hmachhawn dawn a, hnar ngam ang che u. In za hian mi hlawhtling, ram leh khawtlang tana mi ṭangkai tak tak in ni thei vek a ni," a ti a; harsatna leh mangannate chu sual phah nana hmang lo a, Pathian auh nan hmang zel zawk turin a chah bawk.

Social Welfare minister Lalrinpuii pawhin thu a sawi a, Hulhliap SSC-a enkawl mekte chu rilru nghet tak pú a, ruihhlo laka fihlim zui zel turin a fuih a ni.