Khawtlangin camping an buatsaih Excise Minister-in ṭanpuina a hlan

Armed Veng khawtlang ṭangrual chuan an venga ruihhlo ngaite tana August 1, 2025 aṭang khan Agape Camping Centre, Durtlanga camping an buatsaih a, Excise & Narcotics minister Lalnghinglova Hmar-in September 9, Thawhlehni tlai khan tlawhin, ṭanpuina Rs 15,000 a pe. Camping hi September 13, 2025-ah a ṭiak ang.

Excise Minister chuan, Armed Venga Local Council, kohhran, tlawmngai pawl leh mipui ṭangrualin an venga ruihhlo ngaite tana camping an buatsaih chu lawmawm a tih thu a sawi a, "Mahni veng chhung ṭheuha ruihhlo ngaite mi dang kuta dah mai loin, buaipui ila, kawngro thui tak a sut ngei ka ring," a ti.

Khawtlang ṭangrualin camping an buatsaih chuan rah ṭha a chhuah ngei a beisei thu sawiin Lalnghinglova chuan, "Khawtlang hian ruihhlo ngaite buaipui kawngah theihtawp chhuah zel se ka duh. Chutihrual chuan, sorkar pawhin theihtawp a chhuah zel dawn," a ti a, Armed Veng chu veng dangte pawhin entawn se a duh thu a sawi.

Armed Vengah hian Presbyterian kohhran pahnih, Salvation Army, Salvation Church leh UPC (NEI) an awm a, anni ho hian camping atan pawisa an thawh vek bakah, Presbyterian kohhrana Kohhran Hmeichhe pahnih pawhin an thawh. LC, YMA, MUP leh MHIP-te pawhin pawisa an thawh a, KṬP branch pahnihte'n sound system leh ṭul dangte an thawh thung.

An veng chhung mi chhungkaw eng emaw zat pawhin camping atan sum an thawh a, sum thawhtu zingah bialtu MLA B Lalchhanzova leh bialtu corporator Christina Roluahpuii Sailo te pawh an tel. Camp luh ṭan tirhah Excise & Narcotics mi leh sate'n camp lut turte an endik a, 1st MAP-in tui an pe ṭhin bawk.

Camping committee fel tak indinin, anni kaihhruaina hnuaiah camping kalpui a ni a; camp-a lut tur âwma ngaihte chu YMA lamin lekha pein, camp-a lut turin an sawm. An venga damdawi lam thiamte a inchhawkin an duty a; venhimna lam chu VDP, YMA, Kohhran Pavalai Pawl leh KṬP kutah dah a ni.