KHAWTHLIR

Meet your MLA

Minister of state Lalnghinglova Hmar chuan nimin khan a bial chhunga KM Higher Secondary School-ah 'Meet your MLA' a buatsaih a, sikul 13 hnenah greenboard, whiteboard leh water cooler a sem nghal. Minister chuan, taima taka zir tur leh an zirlai dah hmasa ber turin zirlaite fuihin, zirlai rilru chak lo tan pawh taimakna nen tlai luat a awm loh thu a sawi. 'Zirtirtu hlutna leh mawhphurhna' tih thupui sawiho a ni bawk.

Ruihhlo Do Debate

Hnahthial DC office leh MZP Headquarters, Hnahthial chuan nimin khan Hnahthial BDO conference hall-ah Nasha Mukt Bharat Abhyaan hnuaiah district level Inter Higher Secondary School Ruihhlo Do Debate Competition an buatsaih. Thupui chu 'Mizorama ruihhlo kan do dan hi a ṭha tawk' tih a ni a, higher secondary school zirlai 19 an intihsiak a, September 12, 2025 zanah result puan a ni ang.

Drone hman khap

Mamit district magistrate K Laltlawmlova chuan thupek chhuahin, September 13, 2025-ah Prime Minister-in Aizawl (Lammual) aṭangin Bairabi-Sairang inkar rel kawng a hawn dawn avangin Mamit district-ah remote control hmang drone/aerial camera emaw hetiang lam chi reng reng hman/thlawhtir khap a nih thu a puang. Thupek hian September 15, 2025 thleng a huam ang.

Legal Service Clinic

Mizoram State Legal Services Authority member secretary Vincent Lalrokima chuan nimin khan Tuikhuahtlanga Sainik Welfare Office-ah NALSA Veer Parivar Sahayata Yojona 2025 Scheme hnuaia din Legal Service Clinic a hawng. Vincent Lalrokima chuan, Legal Service Clinic-in a tum bulpui ber chu sipai ṭang lai leh báng tawhte leh an chhungte dikna chanvo sum sêng loa humhalhsak te, sum seng loa court leh lok adalat-a kalpui leh buaipuite a nih thu a sawi.

Training buatsaih

Lungleia District Institute of Education and Training zirtirtute chuan nimin khan Hnahthial district-a primary school leh middle school zirtirtute tan 'Lesson Plan Workshop - Onsite Workshop on Constructivist Lesson Plan for MS & PS Teacher' an buatsaih a, vawiinah chhunzawma zawh
a ni ang.

IAS-ah hlang kai

Home secretary ni lai Vanlalmawia, MCS (1998 batch) chu IAS-ah hlankai a ni a, September 9, Thawhlehni khan order tihchhuah a ni.