Lunglei dist-ah cosmic classroom hawng

Mizoram sikula vansang chanchin zirna hmun bik - cosmic class (astronomy lab) hmasa ber leh Lunglei district leh Lungsen Aspirational Block-a zirna tihhmasawnna tura hmalakna hrang hrangte nimin khan School Education minister Dr Vanlalthlana'n a hawng.

Cosmic classroom hi Leitlangpui High School, Lungsen Higher Secondary School leh Tlabung Middle School-ahte din a ni a; Leitlangpui H/S-a mi chu Minister-in a hmunah a hawng a, Lungsen HSS leh Tlabung M/S-a mite chu online kaltlangin a hawng thung.

Lunglei DEO conference hall-a inkhawm buatsaihah Education Minister chuan Lunglei district leh Lungsen Aspirational Block chhunga zirna tihhmasawnna tur ruahmanna hrang hrang a hawng a; sikula zirna chawlhsan tawh naupangte hnenah sikul an kai leh theih nan thirsakawr semin, Book Nest Initiative hnuaia lehkhabu sem turte a dawngtute kutah a hlan nghal.

Minister-in a hawn dangte chu - Learning Bridges, Book Nest Initiative, English Language Foundation (P/S-a English bulṭhut zirna), Project Period Pride leh, Money Wise te a ni.

Learning Bridges hnuaiah hian sikul bànsan tawh naupang hriat chhuah tawh mi 33 zinga sikul lut leh ta hmeichhe naupangte hnenah Disha Foundation-in an pek thirsakawr chu sem a ni a, kalpui zel tum a ni.

Dr Vanlalthlana chuan, cosmic class (astronomy lab) chu a awmna sikul bakah, sikul dangte pawhin ṭangkai taka an hman a beisei thu sawiin, zirna chu khawtlang tana hnawksak lo leh ṭangkai ni tura mi ring zirnaa hmasawn nan sorkar, pawl, sumdawng pawl leh mipui thawhho a pawimawh thu a sawi.

Education Minister chuan, SCERT hnuaiah kumin 2025-26 third term aṭangin Mizorama sikulah pawl 3-8 chinah zawhna inang tlang hmang tura ruahman mek a nih thu a sawi a; sum enkawl dan inzirtirna (financial literacy) pawh zirlaia telh turin SCERT kaltlangin hma an lak thute a sawi bawk.

Cosmic classroom hawnnaah hian Lungleia MLA pathum V Malsawmtluanga, Lalramliana Papuia leh T Lalhlimpuia te, LMC chairman Lalzuithanga leh councillor te, sorkar official te, zirtirtute leh tlawmngai pawl aiawhte an tel.