Minister-in sub-station siam mek a tlawh

Power & Electricity minister F Rodingliana chuan nimin khan Mizoram khawthlang lama kawlphetha lak luh leh pek chhawnna tihchangtlunna tur, North Eastern Region Power System Improvement Project (NERPSIP) hnuaia thawh mek 132/33kV Sub-Station, West Phaileng leh 132/33kV Sub-Station, Marpara a tlawh.

Minister F Rodingliana hian sub-station pahnih, hun rei lote hnua hawn theih tura ruahman chu hawn thuai a nih theihna atan hnathawh dan a enpui a ni.

West Phailenga hnathawh mek a tlawhnaah Minister chuan hna thawktu Power Grid Corporation of India hotute a kâwm a; Mizoram khawtlang lamin kawlphetha hnianghnar zawka an neih theih nan hna zawh thuai a nih theih dan tur a sawipui.

132/33kV Marpara Sub-Station leh 132/33kV West Phaileng Sub-Station siam hna hi September 2018 khan ṭan a ni a, zangnadawmna leh forest clearance-ah harsatna a awm avangin a huna zawh theih lohin rei tak a awm. Tun hnai khan Mizoram sorkar hmalaknain forest clearance atan EFCC department hnenah cheng nuai 189.71 pek a ni a, hna chhunzawm a ni.

Sub-station siam hna leh transmission line thun hna zawh a ni tawh a; 33kV level-a test charge tawh a ni. 132kV level-a test charge leh turin Regional Load Dispatch Centre (RLDC)-ah first time charging phalna an nghak mek.

West Phaileng Sub-Station bikah side drain leh RCC kawng bakah, transit camp siam hna tih loh chu zawh vek tawh a ni a, la zawh lohte chu September 2025 chhungin zawh beisei a ni. Marpara Sub-Station-ah switchyard panna kawng siam hna, side drain, transit camp building, security haat bakah gate siam hnate thawh mek a ni a, March 2026-ah zawh vek beisei a ni.