Architect title & style dik lo taka hmang ṭhinte lakah dan anga hmalak an tum
Mizoram Architects Forum (MAF) chuan, sumdawnna atana architect title & style dik lo taka hmang ṭhin an awm tih sawiin, chutiang mite lakah chuan dan anga hma an lak zel dawn thu an tarlang.
MAF hian nimin khan thuchhuah siamin, "Hun eng emaw chen aṭang khan Mizoramah danin a ngiat anga Council of Architecture (COA) hnuaia licensed & registered architect ni lo, architectural design & service-te pe a, sumdawn nana architect title & style dik lo taka hmang ṭhin an awm tih hriat a ni. Hei hi MAF chuan pawi a tiin, a ngai thutak hle a ni," an ti.
Licensed architect ni lote'n architectural design & services ti thei anga an inchhàl chuan Architects Act 1972 kalha chêtna a nih thu sawiin MAF chuan, "Hetiang hawi zawnga hna lo thawk ṭhinte hi ti tawh lo turin kan hriattir a, dan ang takin hma kan la zel dawn a ni," an ti a; architectural topics ṭhenkhat hriatna leh software ṭhenkhat hman dan zir thiamna ringawtin architectural service pe turin dan anga phalna an neih loh thu an tarlang.
MAF chuan, licensed architect ni loin mahni hamṭhatna leh sumdawnna atana architect title & style an hmang a nih chuan mipui bumna a nih thu sawiin MAF chuan, "In sak kawnga himna hrang hrangah nasa takin a tiderthâwng thei a ni," an ti.
Architect-te chu Par-liamentary act hnuaia kaihruaitu leh khuah-khirhtu mumal tak COA, New Delhi nei an ni tih sawiin MAF chuan, "COA hian hna thawh dan dik leh dik lo te, hna chhiat leh ṭhata mawhphurhtu ni tur te, hna chungchanga rinawm tak leh dik taka thawk turin a phût tlat a, a ṭul angin hremna pawh a lekkawh ṭhin," an ti a; mumal taka license leh khuahkhirhtu (regulating authority) nei si lo, architectural service lo pe ve ṭhinte chuan mipui himna leh kalphungah mumal an nei lo niin an sawi.
MAF tarlan danin, architect hna thawk turin COA pawm university course duan sa ang taka zir chhuakte chauhin COA hnuaiah registration leh license an dil thei a; registration leh license neite chauhin architect title & style’ (architect hming, nihna leh hnathawh phung) an hmangin hna an thawk thei a ni.