Mizoramah kum 20 chhungin vote nei mi 3,15,924-in an pung

Election Commission of India chuan nimin khan Indian International Institute of Democracy and Election Management (IIIDEM), New Delhi-ah Chief Electoral Officers Conference an buatsaih a, Mizoram chief electoral officer Dr Lalrozama a tel. Sorkar thuchhuah chuan, Mizoramah kum 20 chhungin vote nei mi 3,15,924-in an pung tih a tarlang.

Sorkar thuchhuah tarlan danin, Mizoramah voter 8,72,686 an awm mek a, mipa 4,22,319 leh hmeichhia 4,50,367 an ni. Kum 20 kal ta, 2005 khan Mizoram Special Intensive Revision neihah voter 5,56,762 an awm a, voter mipa 2,76,488 leh hmeichhia 2,80,274 an ni al; kum 20 chhunga voter inthlauhna (punna) hi 3,15,924 a ni.

CEO Conference-ah hian Special Intensive Revision of Electoral Roll neih tura inbuatsaihna kalpui mek dan sawiho a ni a; Mizoram CEO Dr Lalrozama'n Mizorama electoral roll ennawnna atana inbuatsaih tawh dan leh voter dinhmun a tarlang. CEO hi joint CEO Ethel Rothangpuii'n a ṭawiawm a ni.