Kulikawn mibo thia hmuh a ni

September 5, 2025-a scooter (scooty) hmanga Serchhip pana kal Henry Lalnunsanga (35) s/o B Kapliana, Kulikawn, Aizawl chu nimin chawhma lam khan thia hmuh a ni.

September 6 zing khan Henry Lalnunsanga scooter chu Chhiahtlang hmar lam dái, khua aṭanga km 2 vela hla, Tuial kawr bulah kawng sirah hmuh a ni a; scooter-ah hian chabi a invuah a, a piah deuhah helmet leh a ip ni ngeia hriat chu hmuh leh a ni.

September 8 khan Chhiahtlang Hmarveng Branch YMA hruaitute chuan an enfiah a; a document aṭangin a chhungte biak pawh niin, a chhungte'n Chhiahtlang an pan nghal. Hmuh zui a nih tâk loh zel avangin Chhiahtlang Hmarveng YMA chuan September 9 aṭangin an zawng ṭan.

Nimin chawhma dar 10:40 vel khan Henry Lalnunsanga chu a helmet an hmuhna aṭanga metre 500 vela hlá, kawng thlangah thia hmuh a ni a; police-te'n a ṭul angte an buaipui hnuah an in panpui a ni.

Henry Lalnunsanga zawngtute hi nimin khan Serchhip DC office aiawhin SDC Dr Marilyn Lalruatkimi'n a tlawh a, hnatlangte ei leh in senso atan YMA hnenah Rs 10,000 a hlan.