LGC-in diamond jubilee an lawm

Lunglei Government College (LGC) chuan nimin khan an auditorium-ah diamond jubilee lawm hmâwrbâwkna an hmang a, Higher & Technical Education (HTE) minister Dr Vanlalthlana'n a hmanpui.

Dr Vanlalthlana chuan, zirlaite chu hlawhtling tura thawhrim a ṭul thu a hrilh a, "Awlsam taka hlawhtlinna a awm lo a, hlawhtling turin rim taka beih a ṭul," a ti a; mi lârna leh hlawhtlinna phêna lang lo lama an thawhrimna zir chiang a, mahni incho nan leh intihchak nan hmang ṭhin turin zirlaite a fuih.

HTE Minister chuan, college-a zirna hmanraw ṭha tak takte leh tunlai thiamnate hmang ṭangkai tur te, entrepreneurship knowledge cell (EKC) chu an hma huna hna an zawn thiam nan leh mahnia intunnun theih nan hmang ṭangkai turin a chah bawk.

Inkhawmah hian Lunglei North bialtu MLA V Malsawmtluanga leh College principal Lalrammuana Chawngthu-te pawhin thu an sawi a; jubilee souvenir chu principal puitling hmasa ber Rev. Dr CL Hminga'n a tlangzarh.

Lunglei College hi September 10, 1963 khan 'Lungleh College' (Lunglei College) tih hming puin din a ni a; principal puitling hmasa berin a hna a zawm ni, September 10, 1964 chu a din ṭan ni atan hman a ni.