YMA Inkhawmpui Lian agenda thlifim

YMA rorelna sang ber dawttu, Central Coordination Committee (CCC) vawi 103-na chu nimin khan Central YMA Hall-ah neih a ni a, October 21-23, 2025 chhunga YMA Inkhawmpui Lian atana agenda lutte an thlifim.

YMA CCC ṭhutkhawm hi CYMA president Lalhmachhuana'n a kaihruai a, general secretary Prof. Malsawmliana'n report a pe. YMA Aizawl city branch aiawh, group leh sub-headquarters aiawh bakah, CYMA hruaitu mi 240 an tel a ni.

YMA Inkhawmpui Liana ngaihtuah atana an pawm zingah - Mizorama hnam dang sumdawng, phalna nei lo tam ta lutuk titlem tura hmalak rawtna, Mizo hmeichhiate'n hnam dang pasala an neih loh nan inzirtirna kalpui rawtna, Zo hnahthlak pêng hrang hrang Mizorama chengte zingah chi bila hmalakna a awm loh nana hmalak rawtna te a tel.

Sorkar khawih thei zingah, ILP khauh leh awmze nei zawka kalpui a nih theih nan sorkara thlen rawtna, tui hnâr humhalh dan siam rawtna, kawngpui chhia vanga harsatna a ziaawm theih nan sorkarin tun aia chak zawka hma a lak theih nana thlen rawtnate a tel. Kumpuan atan 'Ruihhlo do' leh 'Ram leh hnam humhalh' tihte bûk tura pawm a ni.