Sorkarin a hnathawkteah duhsak bik a nei lo - CM

Chief minister Lalduhoma chuan nimin khan CMO conference hall-ah Administrative Training Institute (ATI)-a Mandatory Foundation Training nei mek Mizoram Secretariat Service mi 28 a kâwm a; sorkarin a hnathawkteah duhsak bik a neih loh thu a sawi.

CM Lalduhoma chuan, sorkarah rei lo tê an awm ve tawh chhungin sorkar hnathawk zingah inerna (service rivalry) a nasa tih an hmuh thu a sawi a, "Hei hi ṭha kan ti lo. Sorkar mitah chuan hna thawktute zawng zawng in pawimawh vek a, duhsak bik kan nei lo. Officer-te'n kan hnuaia thawkte welfare kan ngaihthah fo niin kan hria a, kan staff-te'n an chanvo an rawn dil a nih chuan kan ngaihtuahsak ṭhin tur a ni. Hmasawnna hna tam tak hi thumrawn (convergence)-a kalpui a nih avangin department hrang hrangte thawhhona ṭha kan mamawh," a ti.

MSS-te chu sorkar pisa vawng nungtu an nih thu sawiin Chief Minister chuan, "Fel taka engkim kan kalpui hian a zahawm a, notesheet bul ṭantu in nih avangin in ngaihdanin kawng tam takah sorkar a kaihruai ve thei," a ti a; sorkar hna chu rawngbawlnaa ngaia dik leh tui taka thawk turin a chah.