Miss Mizoram contestant-te biangah mittui a luang
Nimin Valentine's Day khan Miss Mizoram 2020 contestant-te chuan Gan Sabra leh Old Age Home an tlawh a, Dawrpui Multipurpose Hall-a he ni puala thisen pek rûnpui neihna pawh an tlawh bawk. Gan Sabra leh Old Age Home-ah hian Miss Mizoram contestant te hnuk a ulh a, an biangah hmangaihna mittui a luang hial!
Gan Sabra-ah hian RFL Plastics lamin naupangte tan tui bottle ṭha tak tak an pekte leh rose par bakah Pran-in naupangte eitur an thawhte chu contestant-te hian an sem a, Piece of Cake-in he event atana an siam V-Day cake an zai nghal bawk.
Old Age Home-ah pawh he event puala 3:16 Plan Solution neitu John Lalpeka'n washing machine a pek chu hlan nghal a ni a, Piece of Cake lamin V-Day cake an tum sak chu zaiin, home a awmte chu rose par pek an ni a, inkawmna hunte neiin, hlim takin hun an hmang ho a ni.
Gan Sabra leh Old Age Home an tlawh hnuah Valentine's Day puala thisen pekna hmun Dawrpui Multipurpose Hall-ah 'Miss' contestant-te hi kal lehin, thisen petute hnenah rose par an hlan a, hei bakah hian mipui hmaah inhmelhriattirnate neiin hun an hmang leh nghal bawk.