GST thar hman hun September 22, 2025: Taxation dept.-in GST rate tihhniamna bungraw man tihniam turin a hriattir

Commissioner of State Tax chuan thuchhuah siamin, sorkar laipuiin Goods & Services Tax (GST) a tihhniam chu September 22, 2025 aṭangin India ram pumah hman tur a nih thu a tarlang a; GST registration nei sumdawngte chu GST rate hniamna bungrua an zawrhte man (rate) tihniam turin a hriattir.

State Tax Commissioner chuan, September 22, 2025 aṭangin India ramah GST rate thar hman tur a nih thu a tarlang a, "Bungraw tam zawkah GST rate tihhniam a nih dawn avangin GST registration nei sumdawngte'n GST rate hniam tâkna bungruate chu a man an tihniam ve tur a ni. Chutianga ti lote chu GST dan hnuaia anti-profiteering measure hmangin hrem theih an ni," a ti.

GST rate thar anga thil man hniam tura ngaih, hniam si lote chu phone number 0389-2336167, 8415065109 leh 9862581640-ah hriattir turin Commissioner chuan mipui a ngen a; Taxation office hrang hrangahte pawh complaint thehluh theih a nih thu a tarlang.

Commissioner of State Tax chuan, sumdawngin GST return file-ah an inhralhna (turnover of taxable sales) chu anmahni dawrtute hnena tax invoice an pek chhuah mil thlapin an tilang tur a nih thu a tarlang a, "An turnover chu an tax invoice pek chhuah copy hmanga thuneitute hnena finfiah theih turin an vawng ṭha zel tur a ni," a ti a; thuchhuah zâwm lote chu hrem (pawisa chawitir) an nih tur thu a tarlang bawk.