KHAWTHLIR

KṬP-in thisen pe

KṬP, Melthum Branch chuan nimin khan Synod Hospital tan thisen unit 10 an pe a, petute mipa pariat leh hmeichhia pahnih an ni.

Faina hnatlang

College Veng, Aizawl chuan nimin khan an veng chhunga zirna-ina zirlaite ko khawmin, hnatlang rûnpui an neihpui a, Aizawl mayor Lalrinenga Sailo leh bialtu corporator R Lalawmpuii ten an hmanpui. Mayor chuan, "Mizote hian fai kan tlin a, faina hi inzirtir zelin nunphungah kan neih a ngai," a ti a; faina lama hmalakna atan College Veng khawtlang hruaitute hnenah Rs 20,000 a hlan. Hnatlangah hian zirna-in paruk aṭangin zirlaite an thawk chhuak a ni.

BJP-in candidate puang thei ṭep

Mizoram BJP president Dr K Beichhua chuan Dampa bial MLA by-election neih tura an candidate tur chungchang zawhna chhangin, candidate an puang thei ṭêp tawh tih a sawi. Central BJP-ah an candidate tur chungchanga lehkha an thawn chu thawn nawn leh tura an tih avangin an thawn nawn leh tawh a, Central BJP pawmpuina an nghah mek thu a sawi bawk.

VC-te tan training

State Institute for Rural Development and Panchayati Raj (SIRDPR)chuan nimin khan Aibawk leh Tlangnuam RD Block hnuaia VC thlan thar mi 63-te tan training an buatsaih. Training hi September 9, 2025 khan ṭan a ni a, vawiinah chhunzawma zawh a ni ang. East Lungdar RD Block chhunga VC member thlan thar mi 26 tan Serchhip District Panchayat Resource Center-ah training buatsaih a ni bawk.

NCC training camp

2 Mizo Battalion NCC chuan September 8, 2025 aṭang khan Lunglei Luangmuala 2nd MAP hmunah NCC cadet-te tan ni 10 awh tur Combined Annual Training Camp (CATC-90) an buatsaih a; junior division, junior wing, senior division leh senior wing cadet 247 an tel. NCC cadet-te hian ni 10 chhungin sipai làm, silai leh ralthuam hman dan, taksa insawizawi leh inthunun, hruaitu ṭha ni tura thil pawimawh leh, khua leh tuite mawhphurhna hrang hrang an zir dawn a ni.