Bairabi - Sairang rêl kawng Mizoram tan mêllung pawimawh a ni - Railways Minister

Sorkar laipuia Railways minister Ashwini Vaishnaw chuan, Bairabi leh Sairang inkar rêl kawng, km. 51-a thui hawn a ni dawn ta chu Mizoram tan mellung pawimawh tak a nih thu leh, Narendra Modi kaihhruai sorkarin Mizoram a ngaih pawimawh thu a tarlang.

Railways Minister hian nimin khan thuchhuah siamin, Bairabi-Sairang rel kawng siam thar chu September 13, 2025 (Inrinni)-ah prime minister Narendra Modi-a'n a hawng dawn tih a tarlang a, "Mizoram tan mêllung pawimawh tak a ni dawn. He rel kawng hi cheng vbc 8,000 chuang sênga siam niin, km 51-a thui a ni a, Mizoram chu a vawi khatna atan rêlin a tlawh ve thei tawh dawn a ni," a ti.

Information & Broad-casting minister ni bawk Ashwini Vaishnaw chuan, Aizawl/Sairang leh Delhi inkara rêl tlan tur, Rajdhani Express te, Aizawl-Kolkata leh Aizawl-Guwahati pawh PM Narendra Modi-a'n a vailiam nghal dawn thu a tarlang.

Railway chanchin leh hmasawnnaah Mizoram a tel ve ta tih sawiin Vaishnaw chuan, "He state hming mawi tak, ralmuang tak hi a mi chengte nunphung mawi tak leh an ze mawi tak avanga hriat a ni ṭhin a, infiamna an ngainatna leh tlang ram mawi tak an neih hi ramin a ngaihlu hle. He bial hi hun rei tak chhung ngaihthah ni ṭhin mah se, kan sorkar chuan kan dah pawimawh hle a ni," a ti.

Ashwini Vaishnaw chuan, Mizoram chu lei hnip, thlai ṭhat duhna a nih avangin lei verh leh lei dawh a harsa tih sawiin, "Lei verh leh lei dawh hi thil harsa tak a nih avangin chona nasa tak a ni. Himalayan Tunneling Method hmangin lei hnip takah ropui takin hna an thawk thei a ni," a ti a; thil harsa tak hlawhtling taka zawh a ni chu lawmawm a tih thu a sawi.

Mizorama rêl kawng siamnaa thil hautak an hmachhawn dang leh chu lirnghing chungchang a nih thu sawiin Vaishnaw chuan, "He bial hi lirnghînna hmun a nih thin avangin a bik taka ruahman a ngai. Thiamna hrang hrang thawh khawm a ni a, engineer bakah hnathawktu tam tak leh tualchhung mite thlawpna hmangin a hlawhtlinna kan hmu thei. India hian hmasawn tura tha a thawh chuan ṭha takin a thawk ṭhin a ni," a ti.

Ashwini Vaishnaw chuan, Railways-in hmun hrang hrangah hmasawnna lian tak tak a thlen tawh tih sawiin, "Bairabi-Sairang rel kawng hian hna tam tak a keng tel a, hmasawnna a thlen nasa dawn a, Mizoram mipui tam takin a takin hmasawnna an hmu dawn a ni," a ti a; khualzinte tan bakah bungraw lak luh leh Mizorama thil tharte hralh chhuahnaah nasa takin awlsamna a siam dawn thu a tarlang.