Rashtriya Poshan Maah hman ṭan a ni

Nimin khan India ramah Rashtriya Poshan Maah vawi riatna hman ṭan a ni a, Mizoramah pawh Social Welfare, Women & Child Development department secretary Lalzarmawii'n Aijal Club-ah a hawng. Hemi rual hian 'Early Childhood Care and Education' chungchangah inràwnkhawmna buatsaih a ni.

Lalzarmawii chuan, Poshan Maah chu naupang kum 6 hnuai lam te, nu nau pai, nau pawm leh tleirawlte'n an mamawh ang chawṭha an ei a pawimawhzia leh chawṭha an ei theihna tura buatsaih a nih thu a sawi a, "Poshan Maah kaltlang hian kan khawtlangah hmasawnna awm ngei ka beisei. Poshan Maah hnuaiah hian kil tinah hmalakna tur a awm a, hma la ṭhate hnenah lawmman pek a ni dawn," a ti a, ṭan rual a pawimawh dawn thu a sawi.

Rashtriya Poshan Maah (National Nutrition Mission) hian thupui panga a nei a; chu'ngte chu - mawm, thlum leh al ei tlem tura inzirtir te, nupui fanaute hriselna atana mipa/pa ber mawhphurhna pawimawhna inzirtir te, 'Zirtir la, ei tur ṭha pe rawh' tih thupui hmanga zirtirna neih (Poshan Bhi Padhai Bhi) te, thing phun (Ek Ped Ma Ke Naam) leh nu hnute tui pawimawihna inzirtirte a ni.

'Early Childhood Care and Education' inrawnkhawmna chungchangah Lalzarmawii chuan, "ECCE kan kalpui danah inrualkhai lo a awm ṭhin a, chu chuan ECCE hi a nihna tur a nih tir lo ṭhin," a ti a; harsatnate sutkian a nih theih nan inrawnkhawmna chu ṭangkai taka hman a nih a beisei thu a sawi.

Inrâwnkhawmnaah hian Women & Child Development director Zoramthangi Chhangte pawhin thu a sawi a; joint director Sailopari kaihhruaiin kal khawmte'n thutiam an sawi rual. Chawhnuah mithiamte'n thupui an sawi a, sawihona hun hman a ni.