PWD leh YMA thawhhona sawiho

PWD leh YMA ten Mizorama kawngpui ṭha a awm theihna tura thawhhona thuthlung an ziah chungchang chu nimin khan Central YMA Hall-ah sawiho a ni a; PWD engineer-in-chief H Zoramliana leh Central YMA president Lalhmachhuana ten an kaihruai.

PWD E-in-C H Zoramliana chuan, PWD-in kawngpui enkawl an ngah thu leh sum indaih lohna vangin duhthusama an enkawl theih loh thu sawiin, YMA ṭawiawmna leh thawhpuina an mamawh thu a sawi a, "Thawhhona thuthlung kan ziah avangin hmun tam takah hmasawnna leh kawngpui siam kawngah awlsamna hmuh tur a awm," a ti.

CYMA President chuan, PWD kawngpui siamte chu pawngpaw sawisel mai loin, MoU ziah a nih avangin PWD ṭawiawma thawhpui tur an nih thu a sawi a; sawisel a ṭul a nih chuan huai taka sawisel tur leh PWD-te enpui zel turin YMA hruaitu kal khawmte a chah.

Sawihonaah hian YMA sub-headquarters, group leh branch aiawhte an tel a; Mizoram hmun hrang hranga kawng siam chungchanga harsatna leh kawngpui chhia chungchangte sawihoa inhrilhfiahna a ni a, zawhna leh chhanna hun hman a ni bawk.

YMA leh PWD hian kum 2018 khan kum thum chhung atan thawhhona thuthlung an ziak a, kum 2022 leh August 8, 2025 khan an ziak thar leh a ni.