LESDE Minister-in bungrua a hlan

Labour, Employment, Skill Development and Entre­preneurship (LESDE) minister Lalnghinglova Hmar chuan nimin khan Operation Kingdom Ministry hnenah hmanrua a hlan a; OKM-a awm, kut themthiamna lam zir chhuakte chu sorkarin an bánah kaih a tum thu a sawi.

Lalnghinglova Hmar chuan, OKM-a awm, training chhuakte fuihin, "Tisa leh thlarau damin in chhuak ang a, hna in thawk thei dawn. Dam duha he hmuna lut in ni a, dam tak tak tum ang che u. OKM aṭanga chhuakte hi an bána kaih kan tum a, theihtawp kan chhuah zel ang," a ti.

OKM-a awmte chu ruihhlo ti ṭhinte an nih thu sawiin Minister chuan, "In duh loh thangah in âwk ve palh a, hetah hian in awm a ni. He hmunah hian sorkarin skill training a buatsaih a, a aia lian zawka buatsaih leh kan tum mek," a ti a; eizawnna kailawn lian zawk buatsaih tum a nih thu a sawi.

Lalnghinglova Hmar chuan, OKM-a awmte chu hneh loh nei an nih thu sawiin, ruihhlo bâwih aṭanga tâl chhuah ngei tum tur leh ṭhat tum turin a fuih a, "That leh sim duh hi Pathianin a lawm a ni," a ti. LESDE Minister hian OKM hnenah rawra chawhpawlhna khâwl a hlan a ni.

MFM executive director Lalramchuanzela'n training report tawi a pe a; OKM dintu Lalruatpuii sawi danin, OKM-ah hian zirlai 430 leh thawktu 50 an awm mek a ni.