Rêl kawng hawnnaa tel turin mipui sâwm

Prime minister Narendra Modi chuan naktuk September 13, Inrinni hian Lammual aṭangin Bairabi-Sairang rêl kawng a hawng dawn a, hawnna inkhawma tel turin Mizoram sorkar chuan mipui a sâwm. PM hian Lammual aṭangin Sairang rel chawlhhmun aṭanga chhuak tur rêl a vailiam nghal ang.

Sorkar thuchhuah chuan, rel kawng hawnnaa tel turin Mizoram mipui sàwm an nih thu a tarlang a, "Lammualah hian a duh apiang tel theih a ni a, luh man a awm dawn loh bakah ID card pawh ken luh a ngai lo ang. Security checking erawh tih a ni thung ang. Tel turte chu zing dar 8:30-ah Lammualah luh kim vek tur a ni," a ti.

Sorkar thuchhuah tarlan danin, rel kawng hawnna inkhawma tel tur zirlaite phur turin bus 14 leh sorkar hnathawkte phur turin bus 26 ruahman a ni.

Lammualah hian ralthuam lam kaihhnawih chi hrang hrang, thil hriam leh zum, zu, chemical lam chi, bag (handbag/backpack, etc.), vaihlo zuk leh hmuam, lighter, tiang (stick) lam chi, tui ûm te ken luh phal a ni lo a; ken luh phal loh thil dang eng emaw zat a awm bawk.