NEP-ah Mizo ṭawng a pawimawh - MZU Registrar

Mizoram University registrar Prof. Lalnundanga chuan, New Education Policy (NEP) hnuaiah Mizo ṭawng a pawimawh tulh tulh dawn thu leh MZU signboard-ah pawh Mizo ṭawng telh zel turin University Grants Commission-in a rawn tih thu a sawi.

MZU Registrar hian nimin khan Pachhunga University College Mizo department-in PUC Seminar Hall-a 'Under-standing Contemporary Mizo Literature: Issues and Concerns' tih thupui zirhona an buatsaihah thu a sawi a; Ministry of Education-in tun hma chuan university signboard-te chu Hindi leh English-a ziak tura a tih ṭhin thu sawiin, "NEP 2020 a chhuah hnuah mahni hnam bil ṭawng telh zel tawh turin min ti a, signboard pawh English, Hindi leh Mizo-in siam zel a ngaih tawh a, Mizo department leh Mizo ṭawng a pawimawh tulh tulh dawn a ni," a ti.

Ni hnih awh tur seminar-ah hian lehkhabu chhuah chungchang te, machine translation hmanga Google translate-a Mizo ṭawng telh chungchang te, artificial intelligence-in Mizo thu leh hla a nghawng dan te, Mizo thu leh hlaa LGBTQ chungchang lang te, Mizo hlaa mahni nun bun ruahna te, Mizo film hmasawnna leh film-a inbiakna ṭawngkamte zir chian a ni ang.