Mizoramah oil depot siam turin AMPEDA-in PM Modi an ngen

All Mizoram Petroleum Dealers Association (AMPEDA) chuan nimin khan prime minister Narendra Modi hnenah lehkha an thawn a, Mizoram chhungah tuialhthei chhêk khâwlna (oil depot) din turin an ngen.

AMPEDA chuan, Mizoramah oil depot a awm loh thu leh tun dinhmunah chuan kawngpui (road transport) hmangin state pawn aṭangin tuialhthei phurh luh ṭhin a nih thu an tarlang a; chuvang chuan tuialhthei lak luhna senso a sàn bik thu te, kawngpuiah harsatna chi hrang hrang a awm ṭhin thu te, Mizoramah tuialhthei a hnianghnar tâwk loh phah thute an tarlang a ni.

Mizoramin oil depot a mamawh tak zet thu ziakin AMPEDA chuan, "Bairabi-Sairang rel kawng hawn a ni mai tawh dawn a, hei hian Mizoram tan hmasawnna tam tak a thlen dawn. Mizoramin oil depot kan mamawh avangin Mizoramah tuialhthei chhêk khawlna (rail-fed oil depot) min siamsak turin kan ngen che a ni," an ti.