Railways Minister-in Sairang station a tlawh

Union Railways minister Ashwini Vaishnaw chuan nimin khan Mizoram a rawn thleng a, Lengpui Airport-ah chief minister Lalduhoma hoin sorkar hotute'n an lo hmuak. Vaishnaw hian Sairang rél chawlhhmun a tlawh nghal a, September 14, Pathianni aṭangin Sairang chawlhhmunah rélin bungrua (goods) a phurh ṭan tur thu a sawi.

Railways Minister chuan, Sairang thlenga rel kawng siam thar hawn a dawn ta chu Mizoram tan mêllung pawimawh tak a nih thu a sawi a, "Look East Policy tihhlawhtlinna pawimawh tak a ni. Delhi-ah Srinagar aṭanga an apple thar ṭha tak tak thawnna atan rel an hmang ang hian, he rel kawng hmang hian Mizoram chuan an thlai leh thei neih ṭha tak tak, state dangin an neih ve lohte an thawn chhuak thei tawh dawn a ni," a ti.

Rél kawng hawn tur chu Mizoram tan India ram state dang nena intlawhpawh tawnna, inkungkaihna ṭha zawk siamtu a nih a besei thu sawiin Ashwini Vaishnaw chuan, "He rel kawng siam nan hian hun leh thâ tam tak sèn a ni a, lei verh dan chi tharte hmuh chhuah a ni," a ti a; Sairanga rel kawng a luh theih nana theihtawp chhuahtute thawhrimna fakawm a tih thu a sawi.

Ashwini Vaishnaw hi rêl hmangin Sairang aṭanga Bairabi thleng a kal nghal a ni.