PM-in rêl kawng a hawng dawn ta

Prime minister Narendra Modi chuan vawiin chawhma dar 10 hian Bairabi-Sairang rêl kawng a hawng dawn a, Delhi leh Kolkata pan tur khualzin rêl a vailiam nghal ang. Lammuala hawnna inkhawma tel turin mi tin sàwm an ni a, tel turte chu zing dar 8:30-ah Lammualah luh tawh tur a ni.

Ruahman dan chuan, Prime Minister hi Delhi aṭangin zing karah chhuakin, Indian Air Force thlawhtheihna hmangin Lengpui Airport-ah a ṭum dawn a, Airport aṭangin helicopter-in Ṭhuampui Helipad a pan ang a, Ṭhuampui aṭangin lirtheiin Lammual a pan ang.

Lammualah hian chawhma dar 10-ah rêl kawng hawn inkhawm ṭan a ni ang a, PM Narendra Modi-a'n rel kawng leh chawlhhmun a hawn dawn bakah, Aizawl (Sairang) aṭanga Delhi leh Kolkata pan tur khualzin rêl pahnih a vailiam dawn. Lammuala hun hman zawhah PM hian Imphal, Manipur a pan dawn a ni.

Northeast Frontier Railway tarlan danin, Prime Minister-in Delhi leh Kolkata pan tur khualzin rêl a vailiam tur hi chawhma dar 10-ah ve ve a ni a, rel tlân (service) tur hawnna (inaugural run) a ni.

Delhi pan tur chu coach 20 niin, September 15, Pathianni zing dar 7:30-ah Delhi (Anand Vihar Terminal) thleng tura beisei a ni a; Kolkata pan tur rêl chu coach 22 nei niin, naktuk Pathianni tlai dar 5-ah Kolkata thleng tura beisei a ni. Sairang-Guwahati tlan tur erawh chu chawhma dar 11:15-ah vailiam a ni ang.

Prime Minister-in Lammual aṭanga rêl kawng a hawnnaah hian tel turin mi tin sawm an ni a, zing dar 8:30-ah chuan Lammual chhungah luh vek tawh tur a ni. Ei leh in tur ken luh phal a ni lo a, hun hman zawhah ei tur sem a ni ang.

Lammualah hian ralthuam lam kaihhnawih chi hrang hrang, thil hriam leh zum, zu, chemical lam chi, bag (handbag/backpack, etc.), vaihlo zuk leh hmuam, lighter, tiang (stick) lam chi, tui ûm te ken luh phal a ni lo a; ken luh phal loh thil dang eng emaw zat a awm bawk.

Prime Minister rawn zin tur avang hian Aizawla lirthei tlân dan tur tihdanglam leh khuahkhirh a ni dawn. Zing dar 6 leh chhun dar 11:30 inkarah PM-in a paltlang tur kawngpui dungah lirthei, bungrua leh thil dang dah phal a ni lo. Zing dar 8:30 leh chhun dar 11:30 inkarah a ṭul dan angin lirthei che vel khuahkhirh a ni ang.

Lirthei tlân dan tihdanglam leh khuahkhirhna turte chu - Ṭhuampui, Bawngkawn, Ramhlun North, Ramhlun Venglai, Ramhlun South, Chaltlang Lily Veng, Chaltlang, Chanmari, Zarkawt, Dawrpui leh Venghlui huam chhung kawngpuite bakah, Lengpui, Sihhmui, Sairang Zero Point, Phunchawng, Rangvamual, Hunthar Veng, Edenthar veng leh Bawngkawn te a ni.