KHAWTHLIR

Naupang inkhawmpui

Naktuk Pathianni hian Presbyterian Kohhran chuan pastor bial hrang hrangah naupang inkhawmpui an hmang dawn a, sunday school-a Beginners aṭanga Sacrament department zirlaite an tel ang. Inkhawmpuiah hian naupangte chu Pathian thu, hla leh thu inchhâng hmangin Pathian thu an puang chhuak dawn a ni. Naupang inkhawmpui hi bial tam zawk chuan intihsiakna atan an hmang a, intihsiak loa hmang bial eng emaw zat an awm bawk. Naupang inkhawmpui hmasa ber chu kum 1931 khan Aizawla Tlangnuam Kohhranah neih a ni.

Thisen pe

Aizawl College chuan nimin khan Civil Hospital, Aizawl tan thisen unit 101 an pe a, petute mipa 88 leh hmeichhia 13 an ni. PYD (North East India), Chhipphir Bial pawhin nimin khan Sekhum community hall-ah thisen pek an huaihawt a, Civil Hospital, Lunglei tan thisen unit 35 an pe a, petute mipa 29 leh hmeichhia paruk an ni.

MLA-in hmanrua pe

South Tuipui bialtu MLA Jeje Lalpekhlua chuan nimin khan MLA fund hmanga Hnahthial Primary School-VII chei thar a tlawh a, greenboard pahnih a pe. Electric Veng leh School of Agricultural Sciences (SAS) hnenah table tennis board leh Hnahthial District Billiards Association hnenah billiards snooker table a hlan bawk.

Khawpui fai inelna

Khawpui fai inelna, Mizoram Cleanliness Competition (MCC) 2025 chu nimin khan Siaha, Champhai, Serchhip leh Lawngtlai district-ahte hawn a ni. MCC 2025-ah hian Aizawl tih loh district khawpui 10 chu tehna hrang hrang 17 hmangin faina lama an dinhmun endik a ni dawn a, powerpoint presentation hmangin an intihsiak dawn bawk. December 2025 aṭanga January 2026 chhungin endiktute'n an endik dawn a, Republic Day 2026-ah result puan a ni ang.