Mizo Language Hackathon tlangzarh; Ṭawng lehlinna app BHASHINI zirho a ni

Information and Communication Technology (ICT) minister Dr Vanlalthlana chuan nimin khan ATI Auditorium-ah Ministry of Electronics and Information Technology hnuaia Digital India BHASHINI Division (DIBD) leh Mizoram ICT department buatsaih 'BHASHINI Rajyam Workshop: Mizoram Chapter' a hawng a, Mizo Language Hackathon a tlangzarh.

BHASHINI app (Bhashini Language Translator) hi artificial intelligence (AI) behchhan mobile application a ni a, India rama ṭawng hrang hrangte lehlin (translate) theihna a ni. Mizo ṭawng a la tel lo a, DIBD leh Mizoram sorkarin June 18, 2025-a thawh dunna thuthlung an ziah kaltlangin Mizorama ṭawng hrang hrangte pawh AI khawl zirtir tura ruahman a ni.

Dr Vanlalthlana chuan, khawvel hmasawn zelah AI hman ṭangkai thiam a pawimawh thu sawiin, "BHASHINI app kaltlang hian mipui hamṭhatna tura sorkarin digital service hrang hrang a pek ṭhinte pawh ṭawng hriatthiam loh vanga a chhawrtu turte'n an bawhzui ngam loh ṭhin kha tunah chuan a awlsam phah tawh dawn a ni," a ti a; Bhashini zirhonaa telte chu an thil zirte mi dang hrilhfiahtu ni turin a chah.

Zirhona hawnna inkhawmah hian ICT secretary Amit Sharma leh DIBD chief executive officer Amitabh Nag te pawhin thu an sawi a ni.

Zirhonaah hian Mizo Language Hackathon atana hmalakna tur te, Bhashini hnuaia hmanraw hrang hrang te, Mitra Programme (MITRA), Bhashini Samudaye leh Bhashadaan te hrilhfiah a ni a; Mizorama BHASHINI technology hmang tura department hrang hrangte'n roadmap an siam dan turte sawiho a ni bawk.