PM-in rêl kawng a hawn turah political party pathum an lawm

Mizorama political party pathum - BJP, MNF leh ZPM te chuan thuchhuah inṭâwm siamin, vawiina prime minister Narendra Modi-a'n Bairabi - Sairang rel kawng a hawng tur chu lawmawm an tih thu an tarlang.

Party pathumte chuan, rel kawngin hmasawnna kawng Mizoram a zawhpui dawn tih tarlangin, "Ram chhung hmun dangte nen awlsam zawkin kan inpawh lehzual dawn. He rel kawng hian Mizoram mipuite tan a ṭha zawngin kawng a hawn ngei kan beisei. Economic, social leh culture lamah kawng hrang hrangin hma min tisawn lehzual ang," an ti.

Him zawk, rang zawk leh tlâwm zawkin veivah theih a ni dawn tih tarlangin political party-te chuan, "Sumdawnna, khualzin hîpna leh hna thawh tur lamah kawng thar a rawn inhawng dawn a ni. Hmasawnna bung thar a lo thleng," an ti a, rel kawng hawn tur chu an lo lawm thu an tarlang.

BJP, MNF leh ZPM-te chuan, rêl kawng siam a hlawhtlin theihna atana sorkar laipui, Mizoram sorkar leh hna thawktute chungah an lawm thu a tarlang a, "He hlawhtlinna hi dawhthei tak leh ṭha taka lo thlawp a, thawhpuina ṭha tak nena lo dawngsawngtu Mizo mipuite ta a ni," an ti.

Thuchhuah inṭâwmah hian Mizoram BJP president Dr K Beichhua, MNF president Zoramthanga leh ZPM president Lalliansawta ten hming an ziak a ni.