MSU-in ‘Zo Hnam Chhan Ni’ hmang

Mizo Students’ Union Aizawl chuan nimin khan ‘Zo Hnam Chhan Ni’ an puan pualin police-te nen ṭangrualin Aizawla hnam dang zingah ILP an enfiah a, ILP nei lo eng emaw zat an man a; Mizo Higher Secondary School-ah ‘Zo Hnam Chhan Ni’ an hmang bawk.

MSU chuan thuchhuah siamin, "Zo Hnam Chhan Ni pual hian Aizawl chhunga hnam dang ILP nei lote dap chhuahna hun Mizoram Police nen hmangin, ILP nei lo mi eng emaw zat man an ni a, thubuai ziah luh nghal a ni," an ti.

Mizo HSS-a Zo Hnam Chhan Ni an hmannaah hian thupui chu ‘Ruihhlo do’ tih a ni a, thupui hi Excise & Narcotics inspector Zothantluangi Chenhrang-in a sawi a; zirlaite chu ruihhlo ti chhin lo tura a chah bakah, ruihhlo donaah ṭan rual a ṭul thu a sawi. MSU president B Lalkhawngaihzuala'n thu a sawi bawk.

MSU chuan hian September thla chawlhkar hnihna Zirtawpni chu Zo Hnam Chhan Ni-ah an puang a, ram leh hnam humhalh’ chungchang inzirtirna hun atan an hmang ṭhin. Nimin khan khaw dangahte pawh ‘Zo Hnam Chhan Ni’ hman a ni a, ram leh hnam humhalh, ruihhlo do leh hma lam hun atana inkaihhruaina chungchangte inzirtir a ni.