Mizorama pawl tam zawk chu sorkar Dodal leh sorkara innghat an ni: CM

Chief minister Lal Thanhawla chuan, Mizorama pawl (asso­ciation) awm zinga a tam zawk chu sorkar dodal pawl leh sorkara innghat an nih thu a sawi.

MZP sub-headquarters, Ser­chhip-in nimina Serchhip DC conference hall-a kumin HSLC, HSSLC leh degree course-a tiṭhate chawimawina hun an buatsaihah thu sawiin Chief Minister chuan, "Mizoramah pawl hrang hrang tam tak a awm a, heng pawl tam zawkte hi sorkar dodal pawl an nih loh pawhin, sorkara innghat an ni," a ti a; pawlte chuan ṭhatna an nei em tih a ngaihtuah fo ṭhin thu a sawi.

Lal Thanhawla chuan, graduate ni si, sorkar hnathawk tura inziak tling zo lo, kuthnathawh hmusit tawh si Mizo ṭhalaite zingah an tam thu sawiin, "Kuthnathawh hi khawvela hna zahawm ber a ni. Intodelh turin hna zahthlak a awm lo," a ti a; ṭhalaite chu an ngaihtuahna siam thar turin a sáwm.

UNO-in July 15 (nimin) kha World Youth Skilled Day-ah a puan thu sawiin Chief Minister chuan, "He ni pual hian prime minister Narendra Modi chuan National Policy for Skill Development & Entrepreneurship leh National Skilled Development Mission a tlangzarh a. Ṭhalaite tan hamṭhatna tur leh chhawr tangkai turin awlsam zawka loan-te pawh an lak theihna turte a buatsaih a ni," a ti.

Hawla chuan, zirlaite chu takna leh tumruhna nen zir a, hmantlak leh chhawrtlak ni tura ṭang mar reng tura fuihin, "Zirlaite tih hmasak ber tur chu Pathian hlauh leh nu leh pate thuawih a ni," a ti a; tum mumal nei loa lehkha zir tan hlawhtlin a harsat thu a sawi.

School Education minister H Rohluna pawhin thu sawiin, "Chhawrtlak leh hmantlak ni turin tih tak takna a ṭul. Zirna hi thil dang nen kalpah chi a ni lo," a ti.

Serchhip MZP-in chawimawina an pekte hi HSLC-a distinction-a pass zirlai 13, HSSLC-a first division-a pass zirlai 17 leh B.A leh B.Sc-a first division-a pass zirllai 21-te an ni. Anni bakah hian Serchhip district chhunga HSLC leh HSSLC result-a 100% pass resul neite chawimawina an hlan bawk.