Chakma NGO-te'n CADC thil tih an dem

Chakma Joint NGO - Young Chakma Asso­ciation, Chakma Mahila Samiti leh Mizoram Chakma Students Union-te chuan thuchhuah siamin, Chakma Auto­nomous District Council (CADC) hnuaiah eirukna hrang hrang a awma an hriat thu an tarlang.

YCA, CMS leh MCSU hruaitute chu July 10, 2015 khan Kamalanagar-ah an ṭhukhawm a, CADC-a ei­rukna chi hrang hrang an hmuh dante an sawiho. CADC sorkara thawktu lak danah te, scheme hrang hrang hnuaia hna thawh danah dik lo a awma an hriat thute an sawi.

Chakma NGO-te chuan, tun hnaiah CADC hnuaia thawk turin advertisement chhuah lo leh eng exam/interview mah awm loin mi 100 vel lak an nih thu an sawi a; dan dik loa thawktu lak chu an dem bakah, ṭhalai lehkhathiamteah nghawng ṭha lo tak siam thei a nih thu an tarlang.

YCA, CMS leh MCSU-te chuan memo­ran­dum siamin, CADC sorkarah an thehlut. Memorandum-ah chuan kum 2013-15 chhunga CADC hnuaia thawktu lakna kalpui tawhte chu dan ang taka ti tur leh, tun hnaia SSA leh department danga thawktu mi 100 chuang lakna chu ni 15 chhunga siamṭha turin an phût a ni.

Chakma NGO-te chuan, an phût anga CADC sorkarin thil a tih loh chuan Anti Corruption Bureau-ah zualko an tum thu an sawi.