KHAWTHLIR
e-payment zirho
Aizawl North Treasury Office hnuaia sorkar department hrang hranga DDO-te pualin nimin khan School Education directorate conference hall ah e-payment zirna buatsaih a ni a, sorkar department hrang hranga DDO 130 chuang an tel.
Financial campaign
State Bank of India (SBI), Champhai buatsaihin Thawhlehni khan Hmunhmelṭhaah Special Financial Literacy Campaign neih a ni a, mipuite chu insurance Scheme hrang hrang PMJJBY, PMSBY, APY leh scheme thar Prime Minister Mundra Yojana (PMMY)-te nihphung leh ṭangkaina zirtir an ni.
Mock drill sawiho
Nimin khan Disaster management & Rehabilitation secretary PC Lallawmsanga hoin mi pawimawhte an ṭhukhawm a; chhiatrupna lian tham a thlen thulha felfai zawka chhanchhuah hna thawh dan enchhinna, 'Mega Mock Drill' buatsaih tura mawhphurhtute hmalak dan tur an sawiho.
Videography zir
Videographer & Filmmakers Association of Mizoram chuan nimin khan Aizawla IPR Conference Hall-ah videography workshop an buatsaih. Mizoram University-a Mass Communication department-a zirlai te, computer zirnaa mite leh video-a thla la ṭhinte an tel a; Kerela aṭanga lo kal, Rahul Balachandran leh Bajju Kurup ten an zirtir.
Khampat leh bungpui
F Biakliana lehkhabu ziah, 'Khampat leh Bungpui' tih chu nimin khan Aizawla IPR Auditorium-ah Art & Culture director R Hmingthanzuala'n a tlangzarh.
RD scheme zirho
Nimin khan SIRD Extention Training Centre, Pukpuiah media-a thawkte pualin Rural Development hnuaia scheme-te chungchang zirhona buatsaih a ni a; ETC principal Dr MS Dawngliani'n kaihruaiin, Lunglei additional DC Lianzela khuallian a ni. Workshop-ah hian Lunglei, Lawngtlai leh Saiha aṭangin chanchinbumite an tel.