CAG Report - Congress mualphonaah ngai

MNF party-a peng hrang hrangte, an president Zoramthanga hoa nimina Mizo Hnam Runa ṭhu­khawm chuan resolu­tion pass in, CAG Report 2015-a sorkar sum hman dik lohzia tarlan a ni chu Congress kaihhruai sorkar mualphonaa an ngaih thu an tarlang.

MNF frontal hrang hrangte hi inhlantharna hun an hmang a, MNYF, MNWF leh MNSF te an tel. Party general secretary (Frontal) TC Pachhunga'n kaihruaiin, president Zoramthanga'n thu a sawi.

MNF resolution chuan, Mizoram sorkarin sum harsatna naménlo a tawh laia sorkar sum hmanthiam lohzia leh hman dik lohzia CAG Report-a a lang chu zahthlak an tih thu a sawi a, "A mawh la tu, Congress sorkar demawm kan ti," an ti.

Serlui-B Hydel project khawl pathum zinga pakhat chauh a hman theih chu pawi an ti a, khawl chhiate siam ṭha thuai turin sorkar an hriattir a; Serlui-B HEP aṭanga kawlphetha hman man cheng vbc. 46 hmuh chhuah a ni tawh chu lawm­awm an tih thu an sawi.

MNF resolution chuan, AMC leh LADC in­thlan lo awm turah theih­tawp chhuah an tum thu tarlangin, Pathian leh mipui zarah chak ngei an inbeisei thu a tarlang.