Taxation deptt-in online shopping aṭanga Chhiah lâk a harsat an ring

Taxation department hotute chuan, internet aṭanga thil chah (online shopping) aṭanga chhiah lak chu thil harsa tak a nih an rin thu sawiin, "Chhiah lak theih dan tur erawh kan zawng ve reng," an ti.

Vanglaini palai zawhna chhangin Taxation department hotute chuan, online shopping aṭanga chhiah lak loh chu state dang pawhin an buaipui tih sawiin, "Parliament-ahte pawh sawi chhuah a ni tawh," an ti a; Parliament-in chhiah lâk theihna dan siam a nih loh chuan state mal anga dan neih chu thil harsa tak a nih tur thu an sawi.

Taxation department hotute sawi danin, miin an hman/ta tura an chah chuan chhiah lâk ngawt theih a ni lo. Miin an thil chahte chu an hralh ngei em tih finfiah a harsa a, sumdawnna atan an hmang tih finfiah a nih erawh chuan chhiah an chawi loh chuan hrem theih a ni. Sumdawnna atana hmang turte pawhin hming chi hrang hranga an chah chuan chhiah lak ngawt theih a ni lo.

Company hrang hrangte'n an inbunna state-ah chhiah an chawi a, chhiah an chawi chhan chu state páwna an hralh chhuah ṭhin vang a ni. Bungruate chu a tam zawng leh rih zawng azirtein value added tax (VAT) lak theih loh chin bituk a ni a, bituk pêl lo bung­ruaahte chuan chhiah lâk theih a ni lo.

Taxation department hotute chuan, Assembly session neih zawh taka pass tâk, 'The Mizoram Entry Tax Bill, 2015' chu hralh leh atana tih ni si lo, VAT lak theih loh chin bituk aia tam daih bungraw lak luh ṭhin aṭanga chhiah lakna tura ruahman a nih thu an sawi.

Entry Tax hnuaiah bungruate chu category hrang hrang 45-ah ṭhen a ni a; category pasarihah chhiah 2% lak a ni dawn a, category pakhatah 3% lak tur niin, a bak zawngah chuan 4% lak a ni ang. He dan hnuaia chhiah lak aṭangin Taxation department chuan kum khatah cheng nuai 300 vel hmuh chhuah theih an inbeisei.

Entry Tax lakna tur ṭhenkhatte chu - agriculture machinery, chemical, coal, hospital equipment, diesel, petrol, computer, balu, lung, leirawhchan, tile, puanthân, motor vehicle, furniture, electrical goods, photographic camera, pipe chi hrang hrang, limestone, generator set, industrial cable, dam­dawi, railway track hmanrua leh tele­comunication hmanruate a ni.