World Youth Skills Day hmang
Labour, Employment & Industrial Training department (LE&IT) leh Confederation of Indian Industry (CII) ṭangkawp buatsaihin nimin khan Aizawla Industrial Training Institute (ITI) auditorium-ah 'World Youth Skills Day' hman a ni a, LE&IT minister Lalrinmawia Ralte khuallian a ni.
Lalrinmawia Ralte chuan, hlawhtling turin kawng bumboh paltlang a ṭul thu sawiin, "Khawvel ram ropui tak takte din chhuahna chu an ram leilung hauhsakna ai pawha hlu zawk skill labour-te an ni," a ti a; zirlai kalkhawmte chu mahni kutkea ding chhuak tawh mi hlawhtlingte entawn ṭhin turin a chah.
Mizo tlangvalte aiin Mizo nulate an tuarchhel zawk emaw tih mai turin ram páwna ei zawng zingah Mizo nula an tam zawk thu sawiin LEIT Minister chuan, "Tlangvalte'n ṭan an lak a hun tawh a ni," a ti a; ram páwna hna thawh intihhmuh a ṭul thu a sawi rualin, fimkhur ṭulna laite erawh hmuh hmaih chi a nih loh thu a sawi.
World Youth Skills Day puala inkhawmah hian state leh central hnuaia vocational course hrang hrang zirlaite an tel a, eizawnna lama mi hlawhtling sawmbikte'n thil pawimawh hrang hrang an zirtir a ni.
Inkhawm zawhah zirlaite hi World Youth Skills Day puala prime minister Narendra Modi in zan dar 6 a a thusawi ngaihthlakpui an ni.
Serchhipah pawh World Youth Skills Day pual hian Sub-Headquarters YMA, Serchhip buatsaih DC conference hall-ah hun hman a ni a, chief minister Lal Thanhawla'n a hman pui.
Lal Thanhawla chuan ṭhalaite chu an tuina zawng taka eizawnna an hmuh theih nan thiamna bik nei tura chher puitlin sorkarin a tum tih sawiin, "Ṭhalaite hi ram innghahna bulpui pakhat an nih bakah age-group lian ber luah tu an ni. Ram hmasawnna leh intodelhna pawh thui takin anmahni ah a innghat a ni. Hei vang hian skill development pawh hi kan uar deuh deuh a ṭul," a ti.
Chief Minister hian ama sum cheng nuai li chuang hmanga a lei hmaraw hrang hrangte chu, Mizoram Youth Commission leh Sub-Headquarters YMA ten Mobile Vocational Training an buatsaih a training zo mi 92 hnenah an hnathawhna tur hmanrua a hlan.