Asapara-ah Bru inenfiahtir awm lo zel

Tripura transit camp-a Mizoram bru-te lâk lêt tumna kal zelah, nimin kha a ni thumna atan Asapara camp-ah Mizorama kir duhte enfiah hna thawh leh a ni a, an hma ang bawkin Mizorama kîr duha inen­fiahtir an awm lo.

Nimina Asapara-a Bru verification centre-ah Mamit SDC Lalfakawma Chhakchhuak leh Kolasib SDC Lalhmingliana leh an thawhpuite chuan chawhma dar 10 aṭanga tlai dar 4 thleng awmin, Bru-te inenfiahtir an nghak a; mahse Thawhṭanni leh Thawhlehni ang bawkin inlan an awm lo a ni. Enfiah hna hi vawiinah chhunzawm a ni dawn a, vawiin hi a tawp ni a ni.

Mizoram sorkar official-te hi Tripura sorkar aṭangin Kanchanpur deputy collector, Annando Bazar Police Station-a sub-inspector leh police dangte'n an ṭawiawm a; Asapara camp-a Mizoram Bru Displaced People Forum branch president Zachhuana, vice president Hmangaiha leh hruaitu dangte an duty bawk.