Mizoramah DNA enfiah theih a ni tawh dawn

Mizoramah mihring nihna finfiahna, Deoxyribonucleic Acid (DNA) a test ve theih tawh dawn. Forensic Science Laboratory (FSL) chuan DNA enfiahna khawl an nei thar a ni.

Thu dawn danin, FSL chuan tun hnai khan DNA enfiahna khawlpui pahnih leh khawl tênau eng emaw zat an nei thar a, a vaiin cheng nuai 100 chuang man a ni. DNA enfiahna khawl neih hma chuan Kolkata, Guwahati leh Tripura-ahte enfiah tur thawn a ngai ṭhin a; tunah erawh chuan Police Headquarters, district SP office leh police battalion hrang hrangah DNA enfiah theih a ni tawh dawna thu dawn a ni.

FSL-a doctor, Dr Lal­rozama chuan, DNA chu mihring nihna finfiahna atana hman ber pakhat a nih thu sawiin, police-te tan phei chuan hnu chhuina atana ṭangkai ber pakhat a nih thu a sawi a; thil sual thlenna hmuna thisen leh mihring hnûhma awmte hmanga thil finfiahna niin, 100%-a rintlak a nih thu a sawi bawk.