Champhai Winery-ah grape her ṭan

Champhai Grape Growers' Society chuan, nimin aṭang khan an member-te thar chhuah grape an lei a, Champhai Winery-ah an her ṭan. Nimin bikah chuan quintal 50 an lei hman a ni.

Grape her ṭanna hun hmanpuitu Champhaia Horticulture officer Lal­vensanga chuan, "Kut hnathawktute thawh rah suma chantir theihna hmun Champhaia din a ni hi a lawmawm hle. Grape Growers' Society-te thawhrimna leh tumruhna vanga hetiang dinhmun hi ding thei a ni," a ti.

Champhai Grape Growers' Society chuan an member-te hnen aṭangin grape hi kg. khat Rs. 30 zelin an leisak a, an member ni lote chu kg. khat Rs. 25-in an leisak thung. Kumin aṭang­in 'Champ Wine' siam chhuak turin hma a la mek a, wine chu ûm khat mililitre 350 a ni ang a, a man tur bithliah a la ni lo.

Sorkar thuchhuah tarlan danin, kum kal ta khan Champhai district-ah grape quintal 1,12,981 thar chhuah a ni a, Champhai Winery-ah quintal 13,000 sàwr a ni.

Champhai Grape Growers' Society leh Gu­wahati-a wine siamtu com­pany, M/s Radiant Manu­facturer Pvt. Ltd ten inrem­na an siam angin, a ṭum khatna atan kumin May thla khan Grape tui (con­centrated wine) litre 16,000 hralh chhuah a ni a; kumin chhungin con­centrated wine litre 36,000 hralh chhuah theih an beisei.