January 15, 2021 aṭangin Sikul kal ṭan a ni dawn lo
School Education department chuan, January 15, 2021-ah sikul kal ṭan leh turin ruahmanna an lo siam tawh a, mahse, thuràwn an lâknate'n a him lo theia an hriat avangin an sût a, sikul kal ṭan theih a ni dawn lo.
Vanglaini palai zawhna chhangin School Education minister Lalchhandama Ralte chuan, department lam chuan sikul kal ṭan hun atan January 15 tinzâwn mah se, Health department leh SDMA State Executive Committee thuràwn an lâk thu a sawi a, "Ziak chuan kan la dawng chiah lo nã a, anni hian a la him tawk loah an ngai a, chuvangin sikul kal ṭan theih a la ni dawn lo," a ti.
School Education Minister chuan, Covid-19 laka himna an ngaih pawimawh thu sawiin, "Mithiam zawkte thuràwn kan la a, anni'n fimkhur ṭul an la tih avangin keini chuan sikul kal luih chi-ah kan ngai lo. Mipui himna a pawimawh hmasa," a ti a; sikul kal ṭan hun tur chu mithiamte ráwn chungin an la ruahman leh tur thu a sawi.
Hetih lai hian, ruahmanna awm tawh angin HSLC leh HSSLC examination chu April 2021-ah buatsaih tum zui zel a ni a; board exam turte an inbuatsaih thiam theih nan CBSE-in a tih angin, MBSE chu model sample question siam tura tih an ni.
November 27, 2020-a School Education Minister hoa department hotute ṭhukhawm chuan, kum 2020 chhung chuan sikul hawn tawh rih loh an rél a; sikul luh hun atan January 15, 2021 an tinzâwn a ni.
Meeting-a an rèl dan chuan, online class neih ṭhin chu December 18, 2020 thleng neih turin an rél a, December 19 aṭanga January 4, 2020 chhung chàwlin, January 5-14, 2021 chhungin online class chhunzawm leh tura ruahman a ni. Sikul luh a la nih dawn loh avangin online class hi chhunzawm zel a ni ang.
Sikul kal theih a nih loh avangin syllabus hman mek chu India ram puma kalpui angin 30%-a tihtlêm a ni a, zirtirtute pawh zirlai paih ṭhen tur leh an zir tur chin hriattir a ni tawh. Pawl 1-8 zirlaite tan bridge course buatsaih ni se, an ti a, SCERT siam turah an dah. Pawl 9 leh 11 zirlaite exam dan tur chu MBSE ruahman turah an dah a, naupangin an thiam ngei ngei tura pawimawh zualte hmaih lo tura inruahman ni se, tih a ni.
Mizoram sorkar chuan Covid-19 avangin March 17, 2020 aṭang khan zirna-in zawng zawng a khâr a, September 21, 2020 aṭangin high school leh higher secondary school bik chu a duh tan hawn theih ni mah se, hripui vangin rei lo te hnuah khâr zui leh nghal a ni.