KHAWTHLIR

Chief minister Zoramthanga chuan a hlawh (December 2020) aṭangin nimin khan Chief Minister's Relief Fund for Covid-19 ah Rs. 48,000 (basic pay aṭanga 60%) a chhûng lut. Nimin thleng khan CM Relief Fund-ah Rs. 22,22,62,137 a lut tawh a, Rs. 19,58,11,013 hman tawh niin, la hman loh Rs. 2,64,51,124 a awm a ni.

State Referral Hospital-ah nimin khan Covid-19 vei mi pathum leh hripui veia rinhlelh mi pali dah luh an ni a, ICU-ah mi pahnih enkawl mek niin, ventilator hmantir ve ve an ni. SRH-ZMC Bulletin tarlan danin, SRH-ah hian hripui vei vangin mi 19 an awm mek a, an zingah kum 60 chung lam mi panga leh kum 14 hnuai lam mi pali an tel. Isolation ward-a awm mi 17 zinga pathum chu oxygen pek an ni.

ZPM Ṭhalai headquarters hruaitute chuan January 6, Nilaini khan Serchhip biala Assembly by-election awm tura inpuahchahna atan Thenzawl an tlawh a, ZPM Ṭhalai Thenzawl block hruaitute nen an inkâwm. ZPM ṭhalaite chuan, by-election awm turah Lalduhoma vote vek turin Thenzawl mipui leh Serchhip bial mipuite an ngen a ni.

Aizawl Traffic SP chuan nimin khan hriattirna tichhuakin, PWD-in January 9, Zirtawpni zan dar 6 aṭangin January 11, 2021 thlengin Saron Veng-Bethlehem Veng Sihlui thleng kawngpui an thawm ṭhat dawn thu a tarlang a; hna thawh chhungin lirthei tlân phal a nih dawn loh thu leh kawngpui sirah lirthei leh bungrua dah phal a nih loh thu a tarlang bawk. 

MJA, Mamit District chuan nimin khan IPRO Paul Rokima hoin a pisaah kum 2021 atana inhlan tharna leh thingpui inhona hun an hmang. Paul Rokima chuan, kum thar a nih angin, MJA nen inpawhtlànna leh thawhhona ṭha tak an neih zel a beisei thu a sawi a, thuthar thehdarhna kawnga ṭang tlang zel tur leh inngeih taka thawhhopuiah a sâwm a ni.