COVID-19 : Mizoram dinhmun Hri vei chhuak tawh zat 98.03%

January 6, Nilaini khan Mizoramah Covid-19 vei mi pakua hmuh chhuah a ni a, an zingah symptom nei pahnih leh tualchhunga kái pali an awm. Nimin khan hripui laka fihlim tawh mi 12 chhuahtir an ni a; chhuahtir tawh zat chu 98.03% a tling.

Hripui vei Nilainia hmuh tharte chu mipa pariat leh hmeichhia pakhat an ni a; ZMC laboratory-a mi pakhat, TrueNAT-PCR hmangin mi pathum leh Rapid Antigen Test (RAT) hmangin mi panga hmuh chhuah a ni.

Nimin khan hripui laka fihlim tawh mi 12 chu enkawlna hmun aṭangin chhuahtir an ni a; SRH-ZMC aṭangin mi pathum, Lunglei Sazaikawn CCC aṭangin paruk, Kolasib SIRD CCC aṭangin pakhat leh Lawngtlai CCC aṭangin mi pahnih an chhuak.

Mizorama Covid-19 vei hmuh chhuah tawh chu mi 4,256 an ni a, mipa 3,127 leh hmeichhia 1,129 an ni. Nimin tlai dar 5 thleng khan damin mi 4,172 (98.03%) chhuahtir an ni tawh a, mi pariat (0.19%) thi tawhin, enkawl mek mi 76 (1.78%) an awm.

January 6, Nilainia swab sample endik dan chu, ZMC laboratory-ah swab sample 278, TrueNAT-PCR hmangin district pasarihah sample 223 leh RAT hmangin district pariatah sample 423 a ni a, a vaiin sample 924 a ni. Covid-19 vei mi pakua hmuh chhuah chu endik zat aṭangin 0.97% a tling.

Mizoramah swab sample 1,84,069 endik a ni tawh a, chu'ng aṭang chuan Covid-19 positive mi 4,256 hmuh chhuah niin, endik zat aṭangin 2.31% a ni.

Covid-19 vei hmuh chhuah tawh mi 4,256 zinga mi 2,012 chu Mizoram chhunga kái chhâwng an ni a; mi 2,244 chu Mizoram páwn aṭanga an rawn luh hnua hmuh chhuah an ni thung.

Sorkar thuchhuah tarlan danin, ZMC laboratory-a hmuh chhuah chu Shivalaya Construction company hnuaia thawk mipa kum 27, Rajasthan aṭanga rawn lut a ni a, Ramhlun North YMA Park, Selinga khung hran lai mek niin, symptom a nei lo.

TrueNAT-PCR hmanga hmuh chhuah mi pathum zinga pahnih chu Melte, Lungleia awm 131 Bn. BSF sipai pahnih, kum 28 leh 29 mi an ni a, Haryana aṭanga rawn lut an ni.

Mizoram chhunga hri kai ve ve an ni a, symptom an nei lo. Pakhat dang chu North Eastern Eletric Power Corporaton Limited (NEEPCO) hnuaia thawk mipa kum 30 mi, tun hnaia Uttar Pradesh aṭanga rawn lut a ni.

Chanmari - 2: Nupa, mipa kum 37 leh hmeichhia kum 35; an kaina hriat loh, pa zawkin symptom a nei.

Mission Vengthlang - 2: Mipa kum 19 leh 59, Dehradun aṭanga haw, Lengpui Airport screening point-a hmuh chhuah, a upa zawkin symptom a nei.

Thenzawl - 1: Mipa kum 35, Orissa aṭanga rawn lut, Lengpui Airport screening point-a hmuh chhuah, symptom nei lo.