Mizo puan tan benchmark buaipui mek

Mizoram sorkar hnuaia 'Technical Sub-Committee on Inspection Structure for Geographical Indication of Traditional Mizo Puan' chuan Mizo puan panga, Mizo ta a ni tih chhinchhiahna Geographical Indication (GI) tag/ registration neih tawh - Puanchei, Tawlhlohpuan, Pawndum, Ngotekherh leh Hmàrámte humhalhna tur benchmark an buatsaih mek a, Covid-19 vangin a hmáwr an la báwk thei lo.

Vanglaini palai zawhna chhangin Sub-Committee chairman Carol VLMS Dawng­kimi chuan, an duh anga an ṭhutkhawm tam theih loh thu a sawi a, "Vawi thum kan ṭhukhawm tawh a, eng emaw zat kan sawiho tawh. Mahse, a hmáwrbàwkna kan la nei thei lo. Kan zingah kum upa deuhte an awm a, Covid-19 avangin duh angin kan inhmukhawm tam thei lo a ni," a ti.

Tarlan tawh angin, Mizo puan pangate humhalh dan tur buaipui tur hian Art & Culture department chuan Art & Culture Secretary kaihhruai 'Committee on Inspec­tion Structure for Geo­graphical Indication of Traditional Mizo Puan' a din a; Committee chuan depart­ment benchmark siam zûlzuia harsatna awm theite chîk zawka chhui chiang lehtu tur Technical Sub Committee a din leh bawk.

Art & Culture department-in Mizo puan humhalhna tura a siam benchmark chu Technical Sub-Committee chuan ennawnin, siamṭhat ngaite an siamṭha a, hman phal dan tur leh ṭul dangte pawh an duang mek a ni.

Sub-Committee-ah hian Art & Culture department joint director Carol VL MS Dawngkimi chu chairman a ni a; member-te chu - Boichhingpuii (Chaltlang), Lalhlimpuii (Zarkawt), MISTIC scientific officer Samuel Lalmalsawma, MISTIC patent officer C Lalthanzuala leh Art & Culture-a technical assistant Vanlalhuma Singson te an ni.