Kum 2014-15 atan NHM sum hmuh Nuai 7134.02-ah nuai 4791 hmang

Kum 2014-15 chhungin sorkar laipuiin Mizorama National Rural Health Mission (NHM) atan cheng nuai 7134.02 a rawn pek thu leh chu'ng zinga nuai 4791 chu hman tawh a ni. Cheng nuai 2343.02 hman lohin a la awm tihna a ni.

Mizoram Legislative Assembly-a zawhna chhânna document-a a lan danin, kum 2014-15 chhungin sorkar laipuiin Mizoram NHM tan ṭum 26 pawisa a rawn pe a, a vaiin nuai 7134.02 a ni. Pawisa a rawn pek hmasak ber hun chu June 4, 2014 a ni a, a pek hnuhnun ber March 30, 2015 a ni thung.

Central-in NHM sum tur a rawn pek chu Mizoram sorkara Finance department-ah a lut a; Finance department chuan NHM-ah ṭum 13 pek chhuahah a hmang. Finance department-in a pek chhuah hmasak ber hun chu September 2, 2014 a ni a, a pek chhuah hnuhnun ber chu March 30, 2015 (document-ah March 30, 2013 tia ziah a ni a, tihsual a nih a rinawm) a ni.

Central-in Mizoram NHM tana sum a rawn pek hmasak ber (June 4, 2014) leh state Finance department-in NHM-a a pek chhuah hmasak ber (September 2, 2014) inkarah hian ni 89 a tla a ni.

Health department chhinchhiah danin, kum April leh May thla chhungin Mizoramah nausen thi 90 an awm thu leh, Infant Mortality Rate (IMR) chu 28 (nau piang 1,000 zelah 28 an thi tihna) a nih thu a tarlang.

Assembly-ah MNF member Lalrinawma zawhna chhangin minister Lal Thanzara chuan, tun dinhmunah Mizoramah RSBY smart card nei mi 1,52,983 an awm thu a tarlang a, kum 2014-15 chhunga RSBY scheme chu Central-in kum khat a pawhsei avangin kum 2015-16 atan enrolment tih thar phal a ni lo tih a sawi. Health Minister chuan, Health department hnuaia in sakah Mizoram PWD Schedule of Rates hman vek a nih thu a tarlang bawk.

April-May 2015-a Nausen thi leh IMR

District Nausen thi IMR

Aizawl East 14 29

Aizawl West 23 22

Champhai 11 39

Kolasib 7 34

lawngtlai 11 34

Lugnlei 6 15

Mamit 3 17

Saiha 10 53

Serchhip 5 38

Total 90 28